मन्थलीमा अलपत्र पर्यटकको उद्धारमा सेनाको जहाज प्रयोग गरिने 

असोज ३०, सोलुखुम्बुु । मौसममा गडबडी भएपछि उडान अवरुद्ध हुँदा मन्थली विमानस्थलमा अड्कीएका पर्यटकलाई सेनाको जहाज मार्फत लुक्ला ल्याइने भएको तयारी भएको छ । रक्षा मन्त्री मानवीर राईको निर्देशन पछि प्रतिकुल मौसमका कारण उडान हुन नसकेर मन्थलीमै थन्किएर बसेका पर्यटकहरूको शिघ्र उद्धारका लागि नेपाली सेनाको जहाज प्रयोग गरि लुक्ला ल्याइने भएको हो ।  मौसम बिग्रिएर उडान अवरुद्ध हुँदा ३ दिन देखि मन्थली अडकिएका ५ सय भन्दा बढी पर्यटकलाई लुक्ला विमानस्थल पु¥याउन नेपाली सेनाको जाहाज प्रयोग गर्न निर्देशन दिएको रक्षामन्त्री राईको भनाई छ ।
यता ट्रेकिङ एजेन्सी एशोसियसन नेपाल (टान) ले रामेछापको मन्थलीमा अलपत्र परेका पर्यटकहरुको विवरण उपलब्ध गराउन पर्यटन ब्यवशायीहरुलाई सर्कुलर जारी गरेको छ । टानका महासचिव सोनाम ग्याल्जेन शेर्पाले तत्काल उद्धार गर्नु पर्ने पर्यटकको संख्या उपलब्ध गराउन ट्रेकिङ कम्पनीहरूलाई आग्रह गर्नुभएको छ । उनका अनुसार न्यनतम ५ सयको सङ्ख्यामा विदेशी पर्यटकहरू मन्थलीमा अलपत्र परेका छन् । नेपाली सेनाको १६ सिट यात्रु बोक्ने जहाजले दैनिक ६ वटा भन्दा बढी चार्टड उडान गर्नेछ । 

त्यस्तै लुक्लामा ३ सयको हाराहारीमा फर्कने विदेशी पर्यटकहरू जहाजको पर्खाइमा रहेको जिल्ला प्रहरी कार्यालय सोलुखुम्बुका प्रमुख डीएसपी द्वारिका प्रसाद घिमिरेले बताए । मौसम प्रतिकुल भएकै कारण सगरमाथा क्षेत्र प्रवेश गर्ने पर्यटकको सङ्ख्यामा गिरावट आएको छ । मङ्गलबार उक्त सङ्ख्या घटेर १ सय ९८ मा झरेको छ । 

शरद ऋतुको मध्य सिजनमा हजारौँ पर्यटकले भरिभराउ हुनु पर्ने खुम्बु क्षेत्रमा अहिले करिब २ हजार ५ सय पर्यटक मात्रै खुम्बु क्षेत्रको भ्रमणमा छन् । पर्यटक कम हुँदा यस क्षेत्रका होटलहरू पनि प्रायः खाली नै रहेको नाम्चेको होटल व्यवसायी छिमिकाल्देन शेर्पाको भनाई छ ।