ट्राफिक प्रहरी कार्यालय सोलुको कारबाही तीव्र : एक महिनामै २ सय बढी कारबाहीमा

कार्तिक १, सोलुखुम्बु । जिल्ला ट्राफिक कार्यलय सोलुखुम्बुले एकै महिनामा एक लाख बढी राजस्व संकलन गरेको छ । गत असोज महिनामा २ सय १४ वटा सवारी साधन कारबाहीमा पर्दा सो राजस्व संकलन भएको हो ।

विभिन्न सवारी नियम उल्लंघन गरी कारबाहीमा परेका १३ वटा ट्रकवाट १० हजार रुपैयाँ, ट्रिपर ३ वटाबाट २५ सय रुपैयाँ, ११९ वटा कार तथा जिपवाट ९६ हजारा ५ सय रुपैयाँ राजस्व संकलन भएको जिल्ला ट्राफिक प्रहरी सोलुखुम्बुका प्रहरी सहायक हवल्दार चन्द्र बस्नेतले जानकारी दिनुभयो ।

यस्तै सवारी नियम उल्लंघन गरेर कारबाहीमा परेका २ वटा बसबाट २ हजार, ६ वटा ट्याक्टरबाट ५ हजार, ५६ वटा मोटरसाईकल मार्फत ६२ हजार ५ सय र १५ वटा टेम्पोबाट १८ हजार ५ सय रुपैयाँ राजश्व संकलन भएको छ । हवल्दार बस्नेतले राजस्व संकलनका लागि भन्दा पनि सवारी दुर्घटना न्यूनिकरणका लागि सवारी साधन चालकहरुलाई कारबाही गर्नु परेको बताउनुभयो ।

यस्तै जिल्लामा एक महिनामा २ वटा सवारी दुर्घटना परेकामा ३ जना घाइते हुनका साथै ३ लाख बराबरको क्षति भएको जिल्ला ट्राफिक प्रहरी कार्यालयको तथ्याङकमा उल्लेख गरिएको छ ।

जिल्ला ट्राफिक कार्यालयका इन्चार्ज कृष्ण कुमार कटवालका अनुसार एक महिनामा ७७ वटा शिर्षकमा विभिन्न जनचेतनामुलक कार्याक्रमहरु सञ्चालन गर्दा १ हजार ५७ जना नागरिकहरुले सहभागिता जनाएका थिए ।

बढ्दो सवारी साधनको चाप, साघुँरो सडक कारण सवारी दुर्घटना हुने गरेकाले यसबारे पनि नागरिकलाई लक्षित गरी सचेतनामूलक कार्यक्रम सञ्चालन भइरहेको जनाईएको छ ।