खुम्बु पासाङल्हामुले तोक्यो सल्लेरी थामडाँडा भाडादर 

कार्तिक २, सोलुखुम्बु ।   प्रतिकुल मौसमका कारण लुक्ला उडान प्रभावित भएपछि स्थलमार्ग मार्फत खुम्बु क्षेत्र भ्रमण गर्न आउने पर्यटकको लागी खुम्बु पासाङ ल्हामु गाउँपालिकाले भाडादर कायम गरेको छ ।  गाउँपालिकाले एक सूचना जारी गर्दै सदरमुकाम सल्लेरीबाट जुभिङ, जुभिङ बाट थामडाँडा सम्मका लागी भाडा दर तोकेको हो । गाउँपालिकाका प्रवक्ता ल्हाक्पा छिरि शेर्पाले एक सूचना जारी गर्दै तोकिएभन्दा बढी भाडा लिन नपाइने निर्देशन गर्नुभएको हो ।

गाउँपालिकाले पर्यटकहरूलाई सल्लेरी देखी जुभिङ दुधकोशी सम्मको १ हजार ३ सय रुपैयाँ भाडादर कायम गरेको छ   । यस्तै जुभिङ देखी थामडाँडा सम्मका लागी १ हजार २ सय रुपैयाँ भाडादर कायम गरेको छ । रिजर्भका लागी भने जुभिङ देखी थामडाँडा सम्म १५ हजार रुपैयाँ भाडादर कायम गरिएको प्रवक्ता शेर्पाले बताउनुभयो ।  यस्तै सूचना मार्फत गाउँपालिकाले क्यु सिस्टम तोक्ने, कृतिम अभाव सिर्जना गर्ने, कुनै पनि बहानामा महँगो भाडादर कायम गर्ने लगायतका कार्य गर्न नपाइने भनकाे छ ।

 यस्तै निर्धारित स्टेसनमा काउन्टर स्थापना गरि यात्रुलाई सहजता दिलाउन पनि भनिएको छ ।  सूचनामा गन्तव्यमा नपुगि यात्रु ओराल्न नपाइने, मौसम प्रतिकुल भएको समयमा बेलुका नौ बजेदेखि बिहान ५ बजे सम्म सवारी साधन कुदाउन नपाइने, खुम्बु क्षेत्र प्रवेश गर्ने सवारी साधनले खरिखोला प्रहरी चौकी र पैयाँ प्रहरी चौकीमा इन्ट्री गराउन पनि पालिकाले भनेको छ ।  उडान प्रभावित भएका कारण अहिले सगरमाथा क्षेत्र भ्रमणका लागी आउने पर्यटक मन्थली विमानस्थलमा अलपत्र परेका छन् भने कतिपय स्थलमार्गबाट सल्लेरी हुँदै लुक्ला जाँदै छन् ।  लुक्ला मार्फत आउने करिव ७ सय जना पर्यटक अहिले मन्थलीमा अलपत्र परेका छन् ।