कार्तिक ३, सोलुखुम्बु । सगरमाथा राष्ट्रिय निकुञ्जमा हेलिकप्टर ल्याण्डीङ शुल्कमात्रै करिव १६ लाख ५० हजार सङ्कलन भएको छ । विभिन्न कम्पनीका हेलिकप्टरहरू सगरमाथा क्षेत्रमा अवतरण गर्दा चालु आर्थिक वर्षको ३ महिनामा १६ लाख ४० हजार रुपैयाँ राजस्व सङ्कलन भएको हो । विदेशी पर्यटक बोकेर सगरमाथा राष्ट्रिय निकुञ्जको हेलिप्याड प्रयोग गरि अवतरण गरेका विभिन्न १० वटा कम्पनीका हेलिकप्टर मार्फत उक्त राजस्व सङ्कलन भएको सगरमाथा राष्ट्रिय निकुञ्ज कार्यालयले जनाएको छ ।
चालु आर्थिक वर्षको ३ महिना साउन, भदौ र असोजमा निकुञ्ज क्षेत्रमा ५ सय ४७ पटक हेलिकप्टर ल्याण्डीङ हुँदा उक्त राजस्व सङ्कलन भएको हो । निकुञ्जका अनुसार डाइनेस्टी हेलिकप्टर सर्भिस कम्पनीले ३ महिनामा ९९ पटक हेलिकप्टर अवतरण शुल्क तिरेको छ । उसले निकुञ्जलाई २ लाख ९७ हजार राजस्व भुक्तानी गरेको छ । यस्तै प्रभु हेलिकप्टर कम्पनीले यो ३ महिनामा निकुञ्जमा २३ पटक निकुञ्ज क्षेत्रमा हेलिकप्टर अवतरण गर्दा ६९ हजार रुपैयाँ राजस्व सङ्कलन भएको छ ।
यता कैलास हेलिकप्टर कम्पनीले ३३ उडानको १ लाख १४ हजार, माउन्टेन हेलिकप्टर सर्भिसले ९१ उडानको २ लाख ७३ हजार, अल्टिच्युड एयरले ६८ उडान वापत २ लाख ४ हजार, फिस्टल एयरले ४४ उडानको १ लाख ३२ हजार, श्री एयरले २७ उडान वापत ८१ हजार रुपैयाँ शुल्क तिरेको छ । यस्तै सिम्रीकले ५० उडानको १ लाख ५० हजार, हेलि एभरेष्टले ६४ उडानको १ लाख ९२ हजार र मनाङले ४३ उडानको १ लाख २९ हजार रुपैयाँ अवतरण शुल्क तिर्दा निकुञ्जलाई कुल १६ लाख ४१ हजार रुपैयाँ राजस्व वापतको शुल्क प्राप्त भएको छ । पर्यटकीय सिजनमा पर्यटकहरू हेलिकप्टर चार्टर गरेर निकुञ्ज क्षेत्र घुम्न आउने गरेका छन् ।
निकुञ्जले आफ्नो क्षेत्रमा रहेको हेलिप्याड प्रयोग गरि अवतरण हुने हेलिकप्टरलाई अवतरण शुल्क वापत १ पटक ३ हजार रुपैयाँका दरले अवतरण शुल्क लिने गरेको छ । पर्यटकीय सिजनमा निकुञ्ज क्षेत्रमा मनग्य हेलिकप्टर अवतरण हुने गरेका छन् । यस वर्षको गत असोज महिनामा निकुञ्जमा सबैभन्दा धेरै हेलिकप्टर अवतरण भएका छन् । उक्त महिनामा मात्रै ४ सय ९० पटक हेलिकप्टर अवतरण भएका थिए । उक्त सङ्ख्यामा हेलिकप्टर ल्याण्ड हुँदा निकुञ्जलाई १४ लाख ७० हजार रुपैयाँ राजस्व सङ्कलन भएको छ । यस्तै भदौमा ३५ पटक हेलिकप्टर ल्याण्ड हुँदा १ लाख ५ हजार र साउनमा २१ पटक हेलिकप्टर ल्याण्ड हुँदा ६३ हजार रुपैयाँ राजस्व सङ्कलन भएको हो ।
Discussion about this post