रावा बेसी गाउँपालिकामा ३४औँ अन्तर्राष्ट्रिय अपाङ्गता दिवस तथा लैङ्गिक हिंसा विरुद्धको १६ दिने अभियान सकियो

मंसिर १८, सोलुखुम्बु । खोटाङको रावा बेसी गाउँपालिकाले “प्रविधिको सही प्रयोग गरौँः लैंगिक हिंसा अन्त्य गरौँ” भन्ने राष्ट्रिय नारा तथा “अपाङ्गता समावेशी समाजको प्रवद्र्धनः सामाजिक उन्नतिको संवद्र्धन” भन्ने अन्तर्राष्ट्रिय नाराका साथ ३४औँ अन्तर्राष्ट्रिय अपाङ्गता दिवस तथा १६ दिने लैंगिक हिंसा विरुद्धको अभियानअन्तर्गत विविध कार्यक्रम सम्पन्न गरेको छ।

वडा नं. १ कुभिण्डेस्थित रत्न राज्य लक्ष्मी आधारभूत विद्यालयको प्राङ्गणमा आयोजित कार्यक्रममा अन्तर आधारभूत (कक्षा ६–८) स्तरीय हाजिरीजवाफ तथा अन्तर माध्यमिक (कक्षा ९–१२) स्तरीय वक्तृत्व कला प्रतियोगिता सञ्चालन गरिएको थियो। हाजिरीजवाफ प्रतियोगितामा शारदा मा.वि. खार्पाले प्रथम, कालिका आ.वि. दुवेकोल–चिण्डे भदौरेले द्वितीय तथा धारापानी मा.वि. डुम्रेधारापानीले तृतीय स्थान हासिल गरेका छन्। विजेता समूहले क्रमशः ६ हजार, ४ हजार र ३ हजार रुपैयाँ नगद पुरस्कार प्राप्त गरेका थिए। वक्तृत्व कला प्रतियोगितामा शारदा मा.वि. खार्पाकी सविता मिजार प्रथम, मेरिना परियार द्वितीय र गोमा तामाङ तृतीय भएका छन्।

उनीहरूले क्रमशः २ हजार, १ हजार ५ सय र १ हजार रुपैयाँ पुरस्कार हात पारे। कार्यक्रमको अवसरमा गाउँपालिकाका प्रत्येक वडाबाट छनोट गरिएका १२ जना अपाङ्गता भएका विद्यार्थीलाई शैक्षिक सामग्री वितरण गरिएको थियो। साथै प्रतियोगितामा सहभागी अन्य विद्यार्थीलाई पनि प्रोत्साहन स्वरूप नगद प्रदान गरिएको समुदायमा आधारित पुनःस्थापना सहजकर्ता सरोज पोखरेलले जानकारी दिनुभयो ।

कार्यक्रममा गाउँपालिका अध्यक्ष फटिक कुमार श्रेष्ठ, उपाध्यक्ष कौशिला कुमारी गुरुङ, प्रमुख प्रशासकीय अधिकृत राजेश दाहाल, वडा नं. १ का अध्यक्ष गेहेन्द्रमान राई, कार्यपालिका सदस्य, वडा सदस्य, योजना शाखा प्रमुख विनोद राई, सूचना प्रविधि अधिकृत युबराज बिष्ट, विद्यालयका प्रधानाध्यापक, शिक्षक, कर्मचारी, आमा समूह, अपाङ्गता समन्वय समिति तथा स्थानीयवासीको सक्रिय उपस्थिति रहेको थियो।