पर्यटकीय सिजनमा पनि नाम्चेका होटल सुख्खा, ३० प्रतिशत पनि छैनन् पर्यटक 

कार्तिक ३, सोलुखुम्बु ।  लुक्लामा उडान अवरुद्ध भएपछि पर्यटकको आवागमन कम हुँदा होटल व्यवसायीहरू मारमा परेका छन् । पर्यटकीय सिजनमा पर्यटकको आवागमनको एक मात्र विकल्प हवाई उडान अवरुद्ध हुँदा नाम्चे बजारका होटल सुख्खा जस्तै बनेका छन् ।  

अघिल्लो वर्ष यसै समयमा थामिनसक्नु पर्यटकको भिड हुने नाम्चे बजारका होटलहरूमा अहिले ५० प्रतिशत पनि बुकिङ नहुँदा होटल व्यवसाय सुख्खा बनेका हुन् ।  लुक्ला उडान अवरुद्ध भएपछि पर्यटकहरू मन्थलीमा अलपत्र परेका थिए  । सगरमाथा क्षेत्र घुम्नका लागी सरद ऋतुको मौका पारेर आएका पर्यटक मन्थलीमा अड्किएपछि नाम्चे लुक्लाका होटलमा सोचेजस्तो व्यापार नभएको होटल व्यवसायी बताउँछन् ।  नाम्चेका लुक्लामा एक हप्ता यता उडान हुन सकेको छैन् ।  

मौसम धुम्मीएपछि उडान हुन नसक्दा कतिपय पर्यटक पैदल यात्रा गरेर नाम्चे पुग्ने गरेका छन् ।  यस अघिका वर्षमा यतिखेर नाम्चेमा १५ सय देखी २ हजारको हाराहारीमा पर्यटकको अाफ्नो हुने गरेकोमा यस वर्ष ८ सय देखी ९ सय हाराहारीमा मात्रै पर्यटक नाम्चे भित्रिएको नाम्चे होटल व्यवसायी सङ्घका सल्लाहकार तथा जम्बाला हामका सञ्चालक लामाकाजी शेर्पाले बताउनुभयो ।  नाम्चे क्षेत्रमा ५५ वटाको हाराहारीमा होटल छन् ति मध्ये २० वटा जति होटल व्यवसायीका रुपमा सञ्चालन हुन्छन्, ति होटलहरूमा पनि ३० प्रतिशतको हाराहारीमा मात्रै पर्यटक पुगेका छन् भने ७० प्रतिशत होटलहरू खाली नै छन् ।  

शरद ऋतुको पर्यटकीय सिजन चलिरहँदा विगत एक हप्ता यता लुक्लाको भिजिबिलिटी कम हुँदा उडान हुन नसकिरहेको लुक्ला विमानस्थलका प्रमुख उमेश पन्थीले बताउनुभयो । विगत ८ दिन यता लुक्लाको भिजिविलीटि ३ हजार देखी ४ हजारको बिचमा भएकाले प्लेनको उडान हुन नसकिरहेको उहाँको भनाई छ ।  प्लेनलाइ अवतरण गर्न भिजिबिलिटी ५ हजार भन्दा माथि चाहिने भएकाले प्लनेनले उडान गर्न समस्या भएपनि हेलिकप्टरले भने दैनिक जसो उडान गरि रहरहेका छन् ।