कोशी प्रदेशका १४ विपद सङ्कटग्रस्त पालिकाले आधा करोड राहत पाउने, कुन कुन हुन त ती पालिका ?

कार्तिक ३, सोलुखुम्बु । राष्ट्रिय विपद जोखिम न्यूनिकरण तथा व्यवस्थापन प्राधिकरण राष्ट्रिय परिषदले कोशी प्रदेशका १४ वटा स्थानीय तहलाई विपद सङ्कट ग्रस्त क्षेत्र घोषणा गरेर राहत उपलब्ध गराउने भएको छ ।  शुक्रबार परिषदका अध्यक्ष एवं प्रधानमन्त्री केपी शर्मा ओलीको अध्यक्षतामा बसेको बैठकले कोशी प्रदेशका ६ जिल्लाका १४ वटा पालिकालाई विपद सङ्कटग्रस्त क्षेत्र घोषणा गरेको हो ।

गत असोज १० देखी १२ गते सम्मको वर्षातले निम्त्याएको बाढी, पहिरो र डुबानबाट प्रभावित प्रदेशका १४ वटा स्थानीय तहलाई विपद सङ्कटग्रस्त क्षेत्र घोषणा गरेर पुनस्थापना र पुनः निर्माणका लागी राहत दिइने भएको हो ।  परिषदले प्रदेशको ओखलढुङ्गाका ३ पालिका चम्पादेवी, सुनकोशी र मानेभन्ज्याङ गाउँपालिकालाई विपद सङ्कट ग्रस्त क्षेत्र घोषणा गरेको हो ।  

यस्तै पाँचथरका फिदिम, फालेलुङ र फाल्गुनन्द गाउँपालिका, उदयपुरको बेलका नगरपालिका, सोलुखुम्बुका सोलुदुधकुण्ड नगरपालिका, माप्य दुधकोशी र खुम्बु पासाङ ल्हामु गाउँपालिका, खोटाङको हलेसी तुवाचुङ, खोटेहाङ र जन्तेढुङ्गा गाउँपालिकालाई विपद संकटग्रस्त क्षेत्र घोषणा गरिएको छ ।

 यस्तै इलामको एउटा पालिका सन्दकपुर गाउँपालिकालाई विपद सङ्कटग्रस्त पालिका घोषणा गरि राहत उद्धार र पुनस्थापनाका लागी राहत उपलब्ध गराइने भएको छ ।  प्रदेशका सबै १४ वटै स्थानीय तहलाई वर्गीकरण गरि कम क्षति भएका पालिकामा राखेर ५० लाख राहत विपद व्यवस्थापन कोषबाट उपलब्ध गराइने जनाइएको छ ।