खोटाङका ३ पालिका विपद सङ्कट ग्रस्त, यि हुन् ५० लाख पाउने पालिका

कार्तिक ३, सोलुखुम्बु । खोटाङका तिन स्थानीय तह विपद सङ्कटग्रस्त क्षेत्रको रुपमा घोषणा भएका छन् ।  गत असोज १० गते देखी १३ गते सम्मको अविरल वर्षात पछिको विनाशकारी बाढी तथा पहिरोले जिल्लाका ३ स्थानीय तहमा बढी क्षती पु¥याएको भन्दै सरकारले यि स्थानीय तहलाई विपद सङ्कटग्रस्त क्षेत्र घोषणा गरेको हो । गत असोज १८ गते बसेको राष्ट्रिय विपद जोखिम न्यूनिकरण तथा व्यवस्थापन प्राधिकरणको बैठकले जिल्लाका ३ स्थानीय तहलाई विपद सङ्कटग्रस्त क्षेत्र घोषणा गरि राहत उपलब्ध गराउने भएको हो ।

 जिल्लाको हलेसी तुवाचुङ नगरपालिका, जन्तेढुङ्गा र खोटेहाङ गाउँपालिका लाई विपद सङ्कटग्रस्त क्षेत्र घोषणा गरि राहत रकम उपलब्ध गराउने भएको हाे ।  यससँगै जिल्लाका यि ३ स्थानीय तहले ५० लाख रुपैयाँ राहत रकम विपद व्यवस्थापन कोष मार्फत पाउने भएका छन् ।  वर्षात पछिआएको बाढीले  यि स्थानीयतहमा पहिरो, डुबान तथा चौपाया क्षति भएको थियो ।  विशेष गरि जिल्लाको खोटेहाङ गाउँपालिका क्षेत्रमा रहेको जिल्लालाई तराईसँग जोड्ने फोक्सिङटार पुल सुनकोशीमा आएको बाढीले बगाएको थियो ।