डेङ्गु संक्रमणका कारण पूर्वमन्त्री केसी अस्पताल भर्ना

मंसिर ४, सोलुखुम्बु ।  पूर्व संस्कृत, पर्यटन तथा नागरिक उड्यान मन्त्री बल बहादुर के.सी बिरामी पर्नु भएको छ । उहाँ केही दिन देखि डेङ्गु लागेर काठमान्डौको ह्याम्स अस्पतालमा उपचाररत हुनुहुन्छ ।
उहाँको स्वास्थ्यमा सुधार भइरहेको केन्द्रिय सदस्य नेपाल तरुण दलका अश्विनबाबु थापाले जानकारी दिनुभयो । केसीले सबैलाई बेलैमा सावधानी भई डेङगुबाट बच्न सावधानी अपनाउन अनुरोध समेत गर्नु भएको छ ।

को हुन् बल बहादुर केसी ?

नेपाली कांग्रेसका केन्द्रीय सदस्य बलबहादुर केसीको जन्म २०१० साल साउन २ गते सोलुखुम्बुको नेचासल्यान गाउँपालिका वडा नम्बर २ मा भएको हो । केसीले विद्यार्थी संगठनबाट राजनीतिक यात्रा प्रारम्भ गर्नुभएको हो ।
बहुदलीय व्यवस्था पछिको पहिलो आम चुनावमा सोलुखुम्बुबाट प्रतिनिधिसभा सदस्यमा विजयी भएका केसीले त्यसपछिका मध्यावधी चुनाव २०५१ र २०५६ सालमा समेत सोलुखुम्बुबाट लगातार जित हासिल गर्नुभयो । २०६४ सालमा भएको पहिलो संविधानसभाको चुनावमा पराजित र २०७० सालको दोस्रो संविधानसभामा विजयी भएका केसी २०७४ र २०७९ भने पराजित हुनुभयो ।

२०२७ सालमा नेविसंघ, महेन्द्ररत्न क्याम्पसको सभापति पद सम्हालेका केसी २०४० देखि ४४ सालसम्म नेविसंघको केन्द्रीय अध्यक्ष हुनुभयो । उहाँ नेपाली कांग्रेस, सोलुखुम्बुको सचिव पनि हुनुभयो ।

उहाँ तीनपटक मन्त्री पनि बन्नुभएको छ । २०५३ सालमा युवा खेलकुद तथा संस्कृतिमन्त्री बनेका केसी २०५६ सालमा आवास तथा भौतिक योजना मन्त्री र २०५८ सालमा संस्कृति, पर्यटन तथा नागरिक उड्डयन मन्त्री बन्नुभयो ।

२०४९ सालदेखि हालसम्म पनि नेपाली कांग्रेसका केन्द्रीय सदस्यमा रहेका केसीले २०४२ सालमा सत्याग्रह आन्दोलनको संयोजक भएर काम गर्नुभएको थियो । २०६२/०६३ को जनआन्दोलनमा नेपाली कांग्रेसको तर्फबाट काठमाण्डौको चावहिल क्षेत्रको इन्चार्जको भूमिका निर्वाह गरेका केसी पटक पटक गरी ७ वर्ष जेल बस्नुभएको छ ।