उदयपुरमा त्रियुगा पुल निर्माणको काम तीव्र

मंसिर ५, सोलुखुम्बु । उदयपुरको चौदण्डिगढी नगरपालिका –१० स्थित मदन भण्डारी राजमार्गसँग हडिया र देवधारलाई जोड्नेगरी त्रियुगा नदीमा पक्की पुल निर्माणको काम तीव्र बनेको छ ।

त्रियुगाकै सिवाही, बेलकाको गिदेरीखोला, धाप्लाङ सुनकोशीलगायतका जिल्लाभित्रका अन्य कतिपय ठुला पक्की पुलको निर्माण कार्य वर्षौंदेखि अलपत्र परिरहेको भए पनि हडिया देवधारको यो त्रियुगा पुल निर्धारित समय सिमाभन्दा एकवर्ष अगावै सम्पन्न गर्नेगरी निर्माण कम्पनीले काम अघि बढाएको पुल सेक्टर धरानका आयोजना प्रमुख इन्जिनिएर दारोगाप्रसादले बताउनुभयो ।

नेपाल सरकार सडक विभागको पुल महाशाखाले डिजाइन एण्ड ब्रिज मोडेल अन्तर्गत मदन भण्डारी राजमार्गको गाईघाट बेल्टार खण्डको देवधारमा हडिया क्षेत्रलाई जोड्ने गरी २०७९ साल मङ्सिर २१ गते ठेक्का सम्झौता गरेर सो पुलको निर्माण कार्य सुरु गरेको थियो ।

बिभागको पछिल्लो नीतिअनुसार निर्माण व्यवसायीले नै माटो परीक्षण, वातारणीय प्रभाव मूल्याङ्कनको प्रतिवेदन तयार पार्ने र लागत इष्टिमेटका आधारमा बजेट सुनिश्चित भएपछि तोकिएको समयसीमाभित्र पुल निर्माण गरिसक्नेगरी डिजाइन स्वीकृत भए अनुसार नै हडिया देवधार जोड्ने त्रियुगा पुलको निर्माण धमाधम अगाडि बढाइएको निर्माण कम्पनीका निर्देशक उमेश श्रेष्ठले बताउनुभयो ।