गोराखानी आविलाई पोशाक तथा शैक्षिक सामाग्री हस्तान्तरण

मंसिर ५, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ९ स्थित गोराखानी आविलाई पोशाक तथा शैक्षिक सामाग्री हस्तान्तरण गरिएको छ । बोम्जन समाज सेवा संस्थाद्वारा ५६ जना विद्यार्थी र ११ जना शिक्षकलाई स्कुल ड्रेस, हस्तान्तरण गरिएको हो । मंगलबार बोम्जन समाज सेवा संस्थाका अध्यक्ष लक्ष्मण तामाङले विद्यालयमै पुगेर स्कुल ड्रेस, झोला र स्टेसनरीका सामग्रीहरु वितरण गर्नु भएको छ ।

विद्यार्थीहरुको शैक्षिक स्तर अभिवृद्धि गराउने उदेश्यले विद्यालयमा पोशाक तथा शैक्षिक सामाग्री सहयोग गरिएको अध्यक्ष तामाङको भनाई छ । यस संस्थाले विगत ४ बर्ष देखि निरन्तर बर्षेनी रुपमा शैक्षिक सामाग्री सहयोग गर्दै आएको गोराखानी आधारभूत विद्यालयका प्रधानध्यापक पासाङ डोमा तामाङले जानकारी दिनुभयो ।

विद्यालयमा बालबालिकाहरुले हातमा किताब र फाटेको कपडामा विद्यालय आउन बाध्य रहेका बेला सहयोग प्राप्त भएकोमा खुसी व्यक्त गर्दै सहयोगी संस्थालाई धन्यवाद दिनुभयो ।

बोम्जन समाज सेवा संस्थाले रोटरी क्लब, सोलुखुम्बु स्कुल डोलिसन लगायत विभिन्न संस्थाहरुसँगको सहकार्यमा सिसा खोला आवि, जनचेतना आवि, गोराखानी आवि लगायत विभिन्न ५ वटा विद्यालयमा विद्यालय पोसाक र झोला साथै शिक्षकहरुलाई विद्यालय पोसाक एवम् खेलकुदका सामग्री वितरण गर्नुका साथै सामाजिक गतिविधिमा कृयाशिल हुँदै आएको छ ।