साेलुका २ पालिकाका गाउँ प्रहरीलाई नेपाल प्रहरीले तालिम दिने

मंसिर ७, सोलुखुम्बु ।  सोलुखुम्बुका २ पालिकाका नगर प्रहरीका लागी ४५ दिने तालिम सुरु भएको छ ।  जिल्ला प्रहरी कार्यालय सोलुखुम्बुका प्रमुख डीएसपी द्वारीका प्रसाद घिमिरेको संयोजकत्वमा ७ सदस्यीय तालिम समितिले तालिम दिने गरि शुक्रबारबाट तालिम सुरु भएको हो ।  एक औपचारिक कार्यक्रमका बीच जिलको खुम्बु पासाङ ल्हामु गाउँपालिका र सोलुदुधकुण्ड नगरपालिकाका स्थानीय पालिका प्रहरीको लागी तालिम सुरु भएको जनाइएको छ ।  जिल्ला प्रशासन कार्यालयका प्रमुख जिल्ला अधिकारी अनोज कुमार घिमिरेको अध्यक्षता एवं सोलुदुधकुण्ड नगरपालिकाका उपप्रमुख गान्धीमाया तामाङको प्रमुख आतिथ्यतामा खुम्बुमा ५ र सोलुदुधकुण्डका ४ जना गरि जम्मा ९ जना पालिका प्रहरीका लागी तालिम आयोजना भएको डीएसपी घिमिरेले बताउनुभयो ।
तालिमको उद्‌घाटन कार्यक्रमको अध्यक्षता गरिरहनुभएका सिडिअाे घिमिरेले नगरप्रहरीले आफ्नो कर्तव्य पालन गर्दा कानुन बाहिर वा क्षेत्राधिकार बाहिरका काम नगर्न निर्देशन दिनुभयो । उहाँले जिल्लाका अन्य पालिकाले समेत नगर प्रहरीको क्षमता अभिवृद्धि गर्न जरुरी रहेको भन्दै जागरुक हुन आग्रह गर्नुभयो ।

यस्तै कार्यक्रममा बोल्दै सोलुदुधकुण्ड नगरपालिकाका उपप्रमुख तथा कार्यक्रमका प्रमुख अतिथि गान्धीमाया तामाङले स्थानीय सरकारका काम कारबाही र कानुनलाई कार्यान्वयन गर्न सक्ने जनशक्ति उत्पादन तालिमले गर्नेमा विश्वास लिनुभएको छ ।

यस्तै खुम्बु पासाङल्हामु गाउँपालिकाका कार्यपालिका सदस्य ल्हाक्पा ग्याल्जेन शेर्पाले गाउँप्रहरीको आवश्यकता हरेक स्थानीय तहलाई रहेको बताउँदै संविधानतः पालिकाका एकल अधिकारहरूलाई कार्यान्वयन गर्नकालागी गाउँप्रहरी आवश्यक रहेको बताउनुभयो ।

कार्यक्रममा बोल्दै डीएसपी  घिमिरेले तालिममा प्रशिक्षण गर्ने जनशक्ति आफू सहित टिममै अनुभवी र दक्ष भएकाले गाउँपालिका र नगरपालिकालाई चाहिने जनशक्ति उत्पादन हुनेमा विश्वस्त हुन आग्रह गर्नुभएको छ ।  उहाँले प्रहरीबाट आधारभूत तालिम लिएपछि कानुनसंवत सँगसँगै आधारभूत ज्ञानमा समेत पोख्त हुने भएकाले तालिमका लागी पालिकाहरूले गरेको आग्रहको सम्मान गर्नुभयो ।