दुई पालिका जोड्ने मोटरेबल पुल १७ करोड बढीको लागतमा बन्दै, पूर्वधार मन्त्री राईले गरे शिलान्यास

कार्तिक ७, सोलुखुम्बु । खोटाङको जन्तेढुङ्गा र बराहपोखरी गाउँपालिकाको सिमानामा पर्ने बुवाँखोलामा सवारी साधन सञ्चालन गर्न मिल्ने पक्की पुल निर्माण हुने भएको छ । मूल्य अभिवृद्धि करसहित १७ करोड ५८ लाख ७९ हजार सात सय २९ को लागतमा निर्माण हुने पुलको कोशी प्रदेशका भौतिक पूर्वाधार विकास एवं स्वास्थ्यमन्त्री भूपेन्द्र राईले बिहीबार शिलान्यास गर्नुभयो ।

शिलान्याससँगै निर्माण पनि प्रारम्भ भएको छ । चिसापानी–देवीस्थान–मैनाटार–पौवासेरा ग्रामीण सडक समीप बग्ने बुवाँखोलामा एक सय ४८ मिटर लामो पुल निर्माण हुनेछ । जिल्लाको प्रमुख व्यापारिक केन्द्र दिक्तेल–खोटाङ बजार हुँदै दक्षिणी क्षेत्र जोड्ने चिसापानी–देवीस्थान–मैनाटार–पौवासेरा सडकमा पर्ने बुँवाखोलामा पुल नहुँदा वर्षायाममा आवागमन ठप्प हुने गरेको छ ।

पुल शिलान्यासपछि आयोजित सार्वजनिक सुनुवाइ कार्यक्रमलाई सम्बोधन गर्दै कोशी प्रदेश सरकारका प्रवक्ता समेत रहनुभएका मन्त्री राईले तोकिएकै समयमा मोटरेबल पक्की पुल निर्माणको काम सम्पन्न गर्न निर्माण कम्पनीलाई निर्देशन दिनुभएको छ । मन्त्रालयले पुल निर्माणमा गर्नु पर्ने सबै सहयोग गर्न तयार रहेको बताउदै मन्त्री राईले समयमै पुल निर्माण गरेर हस्तान्त्रण गर्न निर्माण कम्पनीलाई निर्देशन दिनुभएको हो ।

मोटरेबल पक्की पुल शिलान्यास कार्यक्रममा कोशी प्रदेश सरकारका भौतिक पूर्वाधार विकास राज्यमन्त्री भूमी राजवङ्शी, बराहपोखरी गाउँपालिकाका प्रमुख शालिकराम बञ्जरा, जन्तेढुङ्गा गाउँपालिकाका प्रमुख अरुणादेवि राई लगायतको उपस्थिति रहेको थियो ।