बजारमा भेटियो ३३ हजार बढीको म्याद गुज्रिएका खाद्य सामाग्री, प्रशासनले ग¥यो नष्ट 

मंसिर ७, सोलुखुम्बु ।  सोलुखुम्बुको सदरमुकाम सल्लेरीका विभिन्न स्थानमा बजार अनुगमनका क्रममा बरामद गरिएका सामाग्रीलाई नष्ट गरिएको छ । बजार अनुगमन समितिका संयोजक तथा सहायक प्रमुख जिल्ला अधिकारी रूपेश विश्वकर्माको संयोजकत्वमा अनुगमनका क्रममा पाइएको म्याद गुज्रिएका खाद्य बस्तु शुक्रबार जिल्ला प्रशासन कार्यालय परिसरमा नष्ट गरिएको हो ।  अनुगमन समितिले जिल्ला सदरमुकामको आवाडाँडा क्षेत्र र फाप्लु क्षेत्रमा अनुगमनका क्रममा भेटेका विभिन्न बस्तुहरू बरामद गरि नष्ट गरेको जनाइएको छ ।  

बजार अनुगमन टोलीले पहिलो दिन करिव १४ हजार बराबरको बस्तु जफत गरेको थियो भने दोश्रो दिन २० हजार २ सय २० रुपैयाँ बराबरको सामाग्री जफत गरेको थियो ।  २ पटकको बजार अनुगमनमै अनुगमन टोलीले ३३ हजार ७ सय ८० रुपैयाँ बराबरको सामाग्री जफत गरेको थियो ।  उक्त जफत गरेको बस्तुलाई कानुन अनुसार प्रकृया पुरा गरि नष्ट गरिएको सहायक प्रमुख जिल्ला अधिकारी विश्वकर्माले बताउनुभयो ।

बजारमा म्याद गुज्रिएका सामाग्रीहरू जस्तै पेय पदार्थहरू, खाद्य सामाग्रीहरू, खानेतेल, मसला, चाउचाउ बिस्कुट, मैदा लगायत छ्यापछ्याप्ती भेटिने गरेका छन् । तर बजार अनुगमन पातलो हुँदा यस्ता सामाग्री नागरिकको भान्सामा पुग्ने र स्वास्थ्यमा गम्भीर असर पर्ने भएकाले बजार अनुगमनलाई बाक्लो् बनाउँदै उपभोक्ता अधिकारको संरक्षणमा जिल्ला प्रशासन लागी परेको सहायक प्रजिअ विश्वकर्माले बताउनुभयो ।