नेचासल्यान तीनका जेष्ठ नागरिकलाई स्टिल लौरो प्रदान, जनप्रतिनिधिले सम्झेकोमा खुसी

मंसिर ९, सोलुखुम्बु । सोलुखुम्बुको नेचासल्यान गाउँपालिका वडा नम्बर ३ ले ज्येष्ठ नागरिकहरुको सहाराका लागि लौरो प्रदान गरेको छ । वडा कार्यालयले ७७ बर्ष माथिका १४५ जना ज्येष्ठ नागरिकको सहाराका लागि स्टिल लौरो प्रदान गरेको हो ।

शनिबार १४५ जना ज्येष्ठ नागरिकलाई ज्येष्ठ नागरिक सम्मान कार्यक्रममार्फत एक लाख रुपियाँको बजेटबाट लौरो खरिद गरी प्रदान गरिएको नेचासल्यान गाउँपालिका वडा नम्बर ३ का वडा अध्यक्ष सिताराम भट्टराईले जानकारी दिनुभयो । बुढेसकालमा लौरोले हिँड्नका लागि थप टेवा दिने उदेश्यले लौरो वितरण गरिएको उहाँको भनाई छ ।

उहाँले आगामी दिनमा वडाले ज्येष्ठ नागरिकको पक्षमा थप कार्यक्रम ल्याउने प्रतिबद्धता समेत व्यक्त गर्नुभएको छ । ज्येष्ठ नागरिकलाई घरमा राम्रोसँग हेरविचार गर्न र भविष्यमा आफू पनि बुढो हुने हो भन्ने सोचेर सेवा गर्न परिवारका सदस्यहरुलाई उहाँले आग्रह गर्नुभयो ।

ज्येष्ठ नागरिकहरुले लौरो ग्रहण गर्दै स्थानीय सरकार आफूहरुको साथमा रहेको अनुभूति भएको बताउनुभएको छ । अहिले मात्रै नभई सदैव स्थानीय सरकार रहेको अनुभूति प्रदान गर्न र गाउँको विकास गर्नका लागि जनप्रतिनिधिलाई ज्येष्ठ नागरिकहरुले आग्रह गर्नुभएको छ ।