हलेसीमा खुल्ला महिला फुटबल प्रतियोगिता सुरु, मन्त्री राईद्वारा उद्घाटन

मंसिर ९, सोलुखुम्बु । खोटाङको हलेसीमा खुल्ला महिला फुटबल प्रतियोगिता सुरु भएको छ । हलेसी तुवाचुङ नगरपालिका दुर्छिम, खोटाङको आयोजनामा लैङ्गिक हिंसा विरुद्धको १६ दिने अभियानको अवसरमा आयोजित प्रतियोगिता सुरु भएको हो । ‘मेरो गोल, लैङ्गिक हिंसा विरुद्धको बोल’ भन्ने मुल नाराका साथ आयोजित प्रतियोगिताको शनिबार कोशी प्रदेशका भौतिक पूर्वाधार विकास मन्त्री भुपेन्द्र राईले उद्घाटन गर्नुभएको छ ।

उद्घाटन कार्यक्रमलाई सम्बोधन गर्दै मन्त्री राईले खेलकुद क्षेत्रको विकाससँगै खोटाङका सडक संरचनाको विस्तार र मर्मतमा अन्य जिल्ला भन्दा बढी बजेट ल्याउने प्रतिवद्धता जनाउनुभएको छ । यस्तै हलेसी तुवाचुङ नगरपालिकाका मेयर विमला राईले महिला सशक्तिकणको लािग प्रतियोगिता आयोजना गरिएको बताउनुभयो । खेलको माध्यमबाट महिलाहरु पनि सशक्त छन भन्ने औचित्य पुष्टि गर्न प्रतियोगिता सञ्चभालन गरिएको उहाँको भनाई छ ।

प्रतियोगितामा खोटाङ सहित ओखलढुंगा, भोजपुर लगायतका जिल्लाका गरि १७ टिमको सहभागीता रहेको छ । शनिबार भएको पहिलो खेल हलेसी तुवाचुङ नगरपालिका–७ र हलेसी तुवाचुङ नगरपालिका–९ सल्लेबिच भएको थियो । जसमा हलेसी–७ ले हलेसी–९ सल्लेलाई २–० गोल अन्तरले पराजित गरेको छ ।

यस्तै पहिलो दिन हलेसी तुवाचुङ नगरपालिका–७ केवासी हलेसी र हलेसी तुवाचुङ नगरपालिका–१ बाहुनीडाँडा बिच भएको खेलमा बाहुनीडाँडाले हलेसी तुवाचुङ नगरपालिका–७ केवासी हलेसीलाई ३–० ले पराजित गरेको खेल संयोजक तथा हलेसी तुवाचुङ नगरपालिका–७ .का वडा अध्यक्ष कमल गिरीले जानकारी जानकारी दिनुभयो ।

प्रतियोगितामा प्रथम हुनेले एक लाख ११ हजार १११ र द्वितीय हुनेले ५५ हजार ५५५ को साथमा ट्रफी मेडल र प्रमाणपत्र पुरस्कार प्राप्त गर्नेछन् । यस्तै सेमिफाइनलिस्ट दुई टिमलाई २२ हजार २२२ का दरले ४४ हजार ४४४ प्रदान गरिने छ भने बिधागत रुप उत्कृष्ट हुने खेलाडीलाई पनि नगद सहित आकर्षक पुरस्कार प्रदान गरिने आयोजक हलेसी तुवाचुङ नगरपालिकाले जनाएको छ ।