बढ्दै सगरमाथा छोड्ने पर्यटक, दैनिक ३ सय माथि बाहिरिँदै

मंसिर १३, सोलुखुम्बु । शरद ऋतुको पर्यटकीय सिजन सकिँदै आएपछि सगरमाथा क्षेत्र छाड्ने पर्यटक दिनप्रतिदिन बढीरहेका छन् । पर्यटकीय सिजनको उत्तराद्र्ध लागेसँगै दैनीक ४ सयको हाराहारीमा पर्यटकहरुले सगरमाथा क्षेत्र छोड्दै गरेको बताइएको छ । केही समय अघिसम्म आवागमनले व्यस्त हेुने तेन्जिङ हिलारी विमानस्थल लुक्ला अहिले बाहिरीने पर्यटकका कारण व्यस्त हुने गरेको छ । विमानस्थलका प्रमुख उमेश पन्थीका अनुसार बुधबार मात्रै करिव ४ सय ५० जना पर्यटकले सगरमाथा क्षेत्र छाडेका छन् ।

बुधबार भएको ५७ हेलिकप्टर उडान र २१ हवाइजहाज उडान बाट ४ सय ४३ पर्यटक बाहिरीएको पन्थीले बताउनुभयो । बुधबार लुक्ला छाड्नेमा ३ सय ४० विदेशी रहेको उहाँको भनाई छ । यस्तै विहिबार ३ सय माथि पर्यटकले लुक्ला छाडेका छन् । विहिबार ४७ हेलिकप्टर उडान र १६ प्लेन उडानबाट ३ सय माथि पर्यटकले लुक्ला छाडेका हुन । मंसिर लागेसँगै माथिल्लो क्षेत्रमा क्रमशः चिसो बढ्न थालेपछी सगरमाथा क्षेत्र खाली हुने गरेको छ । शरद यामको पर्यटकीय सिजन अन्तीम तिर आइपुगेकाले अव सबै पर्यटक आ–आफ्नो देश या घर फर्कने पर्यटन व्यवसायी बताउँछन् ।