लुक्ला विमानस्थलमा आगलागी नियन्त्रण र उद्धार सम्बन्धी अभ्यास

मंसिर १३, सोलुखुम्बु । सोलुखुम्बुको लुक्ला विमानस्थलमा अग्नी नियन्त्रण तथा जिवन उद्धार कार्यक्रमको अभ्यास गरिएको छ । विमानस्थलमा हुनसक्ने आगलागीका दुर्घटना सम्बन्धी जोखिमको नयूनिकरणकालागी विमानस्थलमै अभ्यास गरिएको हो ।

आगलागीका घटना हुन सक्ने जोखिमयुक्त स्थान विमानस्थल समेत भएकाले खुम्बु पासाङ ल्हामु गाउँपालिकाको आर्थिक सहयोग एवं स्कटीज रेस्क्यु एण्ड फायर फाइटिङको सहकार्यमा विमानस्थलमा आगलागी नियन्त्रण तथा जिवन उद्धार अभ्यास गरिएको विमानस्थल प्रमुख उमेश पन्थीले बताउनुभयो ।

विमानस्थलमा आगालगीजन्य दुर्घटना भए नियन्त्रणका लागी कति समय लाग्छ, दुर्घटनामा परेका मानिसहरुको उद्धारका लागी कसरी काम गर्न सकिन्छ भन्ने, विषयमा अभ्यास गरिएको पन्थीको भनाई छ । विमानस्थलमा भएका विगतका आगलागीजन्य दुर्घटना र अन्य दुर्घटनालाई मध्येनजर गर्दै विमानस्थलमा अभ्यास गरिएको उहाँको भनाई छ ।

यो अभ्यासले विमानस्थलमा हुन सक्ने सम्भावित दुर्घटनामा कमसेकम क्षती पुग्ने विस्वास लिएको उहाँको भनाई छ । आगलागीजन्य दुर्घटनाको न्युनिकरणका लागी गाउँपालिका र संस्थाले हाल सम्म गाउँपालिकाका विभिन्न ४ स्थानमा यस्तो अभ्यास गरिसकेको गाउँपालिकाले जनाएको छ ।