सोताङ गाउँपालिकाका आयोजना पेटी ठेक्कामा दिन नपाइने

मंसिर १५, सोलुखुम्बु । सोलुखुम्बुको सोताङ गाउँपालिकामा निर्माण हुने आयोजना पेटी ठेक्कामा दिन नपाइने भएको छ । गाउँपालिकाले बिहिबार एक सूचना जारी गर्दै पालिका भित्र सञ्चालन हुने आयोजनाहरु पेटी ठेक्कामा दिन नपाइने भएको हो ।

आयोजनाहरु निर्माण गर्ने सम्बन्धमा गुणस्तर कायम गर्न र जवाफदेही हुनका लागि बोलपत्र स्वीकृत भई आएका जुनसुकै निर्माण व्यवसायीहरुले आफैले निर्माण कार्य गर्नुपर्ने सूचनामा उल्लेख गरिएको छ ।

काम समयमा नसक्ने तथा गुणस्तरमा समेत प्रश्न उठ्ने गरेको भन्दै अर्काे व्यक्तीलाई काम गर्न नदिने निर्णय गरेको गाउँपालिका अध्यक्ष खिलाराज बस्नेतले बताउनुभयो ।

यदि कुनै पनि योजनामा त्यसो गरेको पाईएमा स्थानीय सरकारले निर्णय लिई दोस्रो कम कबुल गर्ने निर्माण व्यवसायीलाई कार्य गर्न निर्देशन दिईने व्यवस्था मिलाईने र दोस्रो कम कबुल निर्माण व्यावसायीले पनि काम गर्न अन्य व्यक्ति तथा संस्थालाई पेटी ठेक्का दिएमा ठेक्का रद्ध गरि पुन : ठेक्का खुलाईने गाउँपालिकाले जनाएको छ ।