दोश्रो चौमासिकमा १३ पीडितलाई ३ लाख ५० हजार बढी राहत 

जेठ १, साेलुखुम्बु । विपद व्यवस्थापन समिति सोलुखुम्बुले पछिल्लो चार महिनामा जिल्लामा ३ लाख ५० हजार बढी नगद राहत वितरण गरेको छ । जिल्ला प्रशासन कार्यालय सोलुखम्बु अन्तर्गत रहेको जिल्ला विपद व्यवस्थापन कोषबाट पौष महिना देखी हाल सम्म जिल्लाका अागलागी, बाढी पहिरो पीडित तथा विपदजन्य घटनाबाट जनधनको क्षति व्यहोरेका १३ परिवारलाई ३ लाख ५४ हजार रुपैयाँ राहत वितरण गरिएको कार्यालयले जनाएको छ ।  

आइतबार विपद व्यवस्थापन समितिको बैठकमा विवरण अनुमोदन गराउने क्रममा सहायक प्रमुख जिल्ला अधिकारी सरोज अर्यालले उक्त रकम तथा अन्य बिभिन्न राहत सामाग्री पीडितलाई वितरण गरिएको जानकारी दिनुभएको छ । समितिले  आगलागीबाट परिवारका एक सदस्य गुमाएका जिल्लाको सोलुदुधकुण्ड नगरपालिका वडा नम्बर ४ का डोल्मा शेर्पालाइ २ लाख राहत रकम उपलब्ध गराएको छ ।

यस्तै आगलागीबाट घरबास गुमाएका माप्य दूधकोशी गाउँपालिका वडा नम्बर २ का शम्भु राई, सोलुदुधकुण्ड नगरपालिकाको लौरेश्वर बाबा धाम तथा आङ निमा शेर्पा र गोपाल बहादुर बुढाथोकी, नेचासल्यान गाउँपालिका २ का थिरकुमार राई, रत्ना राई, शक्ति राई, ज्ञान बहादुर खत्री र माप्य दूधकोशी गाउँपालिका ५ का छिरिङ शेर्पालाई १५ हजार रुपैयाँ राहत रकम सहित अन्य राहत सामाग्री वितरण गरिएको छ ।  माप्य दूधकोशी गाउँपालिकाका मानवीर राईलाई ७ हजार, सोलुदुधकुण्ड नगरपालिका ११ का बम बहादुर राईलाई १० हजार राहत रकम वितरण गरेको छ ।

 समितिले विपदमा परेका पीडितहरूलाई ५३ थान त्रिपाल, २७ थान ब्ल्याङ्केट, ५ थान एकोलिक ब्ल्याङ्केट, २७ थान डसना र ३ थान फाइबर सिरक वितरण गरेको छ ।  विपद व्यवस्थापन समितिले क्षतिको प्रकृति हेरेर राहत रकम वितरण गर्ने अर्यालले बताउनुभयो । समितिले चालु आर्थिक वर्षको ९ महिना हाल सम्म ८ लाख ५५ हजार रुपैयाँ रकम राहत वितरण गरेको छ ।