अशक्त तथा अपाङ्गता भएका बालबालिकालाई लिखुपिकेले दियाे न्यानो कपडा 

मंसिर ८१, सोलुखुम्बु ।  ३३ औँ अन्तराष्ट्रिय अपाङ्गता दिवसको अवसरमा लिखुपिके गाउँपालिकाका अशक्तलाई घरमै पुगेर न्यानो कपडा वितरण गरिएको छ ।  गाउँपालिकाको आयोजनामा सम्पन्न एक कार्यक्रमका अवसरमा गाउँपालिका अध्यक्ष एवं कार्यक्रमका प्रमुख अतिथि मिना कार्की बस्नेतले उनीहरूको घरमै पुगेर अशक्त तथा अपाङ्गता भएका बालबालिका लगायत अन्य व्यक्तिहरूलाई न्यानो कपडा वितरण गर्नुभएको हो ।

उहाँले फरक क्षमता भएकाहरूलाई समेत अन्य सामान्य मानिस सरह बाच्न पाउने अधिकार रहेको भन्दै प्रदत्त अधिकारको थप कार्यान्वयनको पाटोमा गाउँपालिका लागी परेको बताउनुभयो । उहाँले फरक क्षमता भएका व्यक्तिहरूको हक अधिकार सुनिश्चितताका गाउँपालिकाले जोड दिएको बताउनुभएको छ ।  चिसो मौसममा अन्य व्यक्तिका तुलनामा अपाङ्गता भएकाहरूलाई थप समस्या हुने महसुस गरि न्यानो कपडा वितरण गरिएको अध्यक्ष कार्कीले रेडियो एभरेष्टलाई बताउनुभयो ।