अपाङ्गता भएका व्यक्तिलाई माप्य दुधकोशीद्धारा विभिन्न सामाग्री वितरण

मंसिर १९, सोलुखुम्बु । ३३ औँ अन्तराष्ट्रिय अपाङ्गता दिवसको अवसरमा माप्य दुधकोशी गाउँपालिकाका अशक्तलाई विभिन्न समाग्री वितरण गरिएको छ । करुणा फाउण्डेशन नेपालको सहकार्य तथा माप्य दुधकोशी गाउँपालिकाको आयोजनामा विश्व अपाङ्गता दिवसको अवसरमा विभिन्न समाग्री वितरण गरिएको हो ।

कार्यक्रममा ७५ जना अपाङ्गता भएका व्यक्तीहरुलाई विभिन्न सामाग्री वितरण गरिएको गाउँपालिकाले जनाएको छ । पालिका भित्रका ७५ जनालाई लठ्ठी, चस्मा, चियर वितरण गरिएको थियो ।

“समावेशी तथा दिगो भविष्यको पूर्वाधार, अपाङ्गता भएका व्यक्तिहरूको प्रबल नेतृत्व यसको आधार” भन्ने मूल नाराका साथ विविध अभिमुखीकरण कार्यक्रमसहित भव्य रूपमा दिवस मनाइएको पालिका उपाध्यक्ष गौरव राईले जानकारी दिनुभयो ।

उक्त दिवसमा अपाङ्गता रोकथाम, पुनःस्थापना र समावेशीकरण प्रक्रियालाई प्रवर्द्धन गर्ने उद्देश्यसहित विभिन्न अभिमुखीकरण कार्यक्रम गरिएको छ । संयुक्त राष्ट्रसङ्घले सन् १९८१ देखि अपाङ्गता भएका व्यक्तिहरूको हक, हित र अधिकार प्राप्तिका लागि अन्तर्राष्ट्रिय रूपमै अपाङ्ग दिवस मनाउँदै आइरहेको सन्दर्भमा ३ डिसेम्बर १९९२ देखि नेपालले पनि उक्त दिवस मनाउँदै आएको छ ।