सडकको समस्या समाधान गर्न रक्षामन्त्री राई गृहजिल्लामा 

मंसिर २२, सोलुखुम्बु । सरकारका रक्षा मन्त्री मानवीर राई गृहजिल्ला सोलुखुम्बु आउनुभएको छ ।  शनिबार रक्षामन्त्री राई सल्लेरी आइपुग्नुभएको हो ।  नेपाल एअरलाइन्स मार्फत रक्षामन्त्री राई फाप्लु विमानस्थल ओर्लनुभएको जनाइएको छ ।  लामो समयदेखि विवादीत रहेको सल्लेरी आवाडाँडा हुँदै थातीङ, च्याल्सा जाने सडकको ट्रयाक ओपन गर्न समन्वयगर्ने हेतुले राई सल्लेरी आउनुभएको बताइएको छ ।

 उक्त सडक खोल्नका लागी जग्गा सम्बन्धी विवाद लामो समयदेखी चर्किरहेको बेला रक्षामनत्री राई आउनुलाई विशेष महत्वका साथ हेरिएको छ । आवाडाँडा थातिङ च्याल्सा सडकका लागी विगतमा व्यक्तिगत जग्गाबाट बाटो प्रयोग हुँदै आएकोमा उक्त बाटो जग्गाधनीले बन्द गरिदिएपछि अहिले सल्लेरी देखी माथिल्लो क्षेत्रका नागरिक सडक विहीन बनेका छन् ।  साविकको गोरेटोबाट सडक ट्रयाक खोल्ने विषयमा स्थानीयले ताकेता गरिरहेको भएपनि उक्त स्थानमा हाल नेपाल आर्मीको ब्यारेक भित्र पर्ने भएकाले भएकोले आर्मीले जग्गा दिन आनाकानी गर्दा थातिङ, च्याल्सा क्याम्पस क्षेत्रका नागरिक सडक विहीन बनेका हुन ।

 नेपाली सेना रक्षा मन्त्रालय अन्तर्गत पर्ने भएकाले रक्षामन्त्री पनि जिल्लाबाटै निर्वाचीत प्रतिनिधि सभा सदस्य भएकाले अहिले सडक खुल्ने प्रबल आशा नागरिकमा छ । यद्यपि यसअघि रक्षामन्त्री राईले समन्वय गर्ने भनेपनि हाल सम्म यो विषयले ठोस निष्कर्ष पाउन सकेको छैन । सल्लेरी आउनुभएका रक्षामन्त्री राईले उक्त सडकको समस्या समाधानका लागी समन्वय गर्न प्रमुख जिल्ला अधिकारी अनोज कुमार घिमिरे, डिएसपी द्वारीका प्रसाद घिमिरे सहित स्थलगत निरीक्षण गर्नुभएको छ ।  माथिल्लो सल्लेरी क्षेत्रका नागरिकलाई कसरी बाटो दिन सकिन्छ भन्ने विषयमा छलफल भइरहेको श्रोतले बताएको छ ।  सडक नहुँदा अहिले उक्त क्षेत्रमा एम्बुलेन्स सम्म जान सक्ने अवस्था छैन  ।