हिमगंगा माविले मनायो आफ्नो ७२ औँ वार्षिक उत्सव

मंसिर २३, सोलुखुम्बु ।  सोलुखुम्बुको लिखुपिके गाउँपालिका स्थित हिमगङ्गा माध्यमिक विद्यालयले ७२ औँ वार्षिक उत्सव मनाएको छ ।  शनिबार एक कार्यक्रमका बीच  गाउँपालिका अध्यक्ष मिना कार्की बस्नेतको प्रमुख आतिथ्यतामा विद्यालयको ७२ औँ वार्षिक उत्सव मनाएको हो ।

७२ औँ वर्षमा पुगेको विद्यालयले गाउँपालिकाको शैक्षिक क्षेत्रमा ठुलो योगदान गरेको कार्यक्रमका प्रमुख अतिथि तथा गाउँपालिका अध्यक्ष बस्नेतले बताउनुभएको छ ।  उहाँले हिमगङ्गा मावि गाउँपालिकामै अग्रणी शैक्षिक संस्था भएकाले विद्यालयको बृहत्तर विकासमा गाउँपालिकाले साथ दिने बताउनुभएको छ ।

 शनिबार वार्षिक उत्सवको अवसरमा आयोजित कार्यक्रमको सभापतित्व विद्यालय व्यवस्थापन समिति अध्यक्ष नारायण बहादुर  बस्नेतले गर्नुभएको थियो । कार्यक्रममा गाउँपालिकाका शिक्षा शाखा प्रमुख रेखराज बस्नेत, गाउँपालिकाको वडा नम्बर २, ३ र ४ का अध्यक्षहरू लगायत विद्यार्थी, अभिभावक, शिक्षक लगायत सरोकारवालाको उपस्थिति रहेको थियो ।  वार्षिक उत्सवका अवसरमा विद्यालयमा अन्य विभिन्न प्रतियोगितात्मक कार्यक्रमहरू समेत आयोजना गरिएको जनाइएको छ ।