टुहुरे पुग्यो लैङ्गिक हिंसा विरुद्धको १६ दिने अभियान, जनतालाई कानुनी परामर्श र जनचेतना 

मंसिर २३, सोलुखुसम्बु । सोलुखुम्बुको नेचासल्यान गाउँपालिका ५ टुहुरेमा लैङ्गिक हिंसा विरुद्धको १६ दिने अभियान अन्तर्गत कानुनी परामर्श तथा अन्तरकृया कार्यक्रम सम्पन्न भएको छ ।  नेचासल्यान गाउँपालिकाका उपाध्यक्ष एवं न्यायिक समितिका संयोजक विना राईको प्रमुख आतिथ्यतामा १६ दिने अभियानको १३ औँ दिन विभिन्न जनचेतनामूलक कानुनी परामर्श तथा अन्तरकृया कार्यक्रम गरिएको हो ।

 गाउँपालिकाको आयोजना तथा अन्तरपार्टी महिला सञ्जाल नेचासल्यानको सहकार्यमा कार्यक्रमको आयोजना गरिएको जनाइएको छ । कार्यक्रममा गाउँपालिका उपाध्यक्ष राईले वडावासीका लैंङ्गिक हिंसा सम्बन्धी समस्या हल गर्न आफू सहित पालिका प्रतिबद्ध रहेको बताउनुभएको छ ।  उहाँले भौगोलिक कठिनाइका कारण नागरिकलाई अन्यत्र उपस्थित हुन असहज हुने भएपछि कार्यक्रमलाई टुहुरेमै आयोजना गरिएको बताउनुभयो ।

कार्यक्रममा कानुनी परामर्श तथा जनताको हक अधिकार र लैङ्गिक हिंसाको बारेमा अधिवक्ता दिपेन्द्र शर्मा र इलाका प्रहरी कार्यालय नेचाका प्रहरी निरीक्षक पुष्प दर्लामीले सहजीकरण गर्नुभएको थियो । कार्यक्रममा उपस्थित टुहुरे बासिले यस्तो कार्यक्रम गाउँमै आयोजना गरिएकोमा खुसी व्यक्त गरेको सहकर्मी धनकुमार ढुङ्गेलले बताउनुभयो ।

यस्तै आइतबार वडा नम्बर ५ को बुटुले चौर खोप केन्द्रमा अभियान सञ्चालन गरियो । कार्यवाहक वडा अध्यक्ष प्रेम प्रसाद श्रेष्ठको अध्यक्षतामा कार्यक्रम भएको हो ।  उपाध्यक्ष राईकोको प्रमुख आतिथ्यतामा सम्पन्न कार्यक्रममा कानुनी परामर्श सम्बन्धी कृयाकलाप गरिएको छ ।