शरद ऋत्रुको पर्यटकीय सिजनमा २० हजार बढी विदेशी आए खुम्बु क्षेत्र, ५ करोड बढी राजस्व उठ्यो 

मंसिर २३, सोलुखुम्बु ।  शरद ऋतुको पर्यटकीय सिजनमा २० हजार बढी विदेशी पर्यटकले सगरमाथा क्षेत्र भ्रमण गरेका छन् ।  सगरमाथा राष्ट्रिय निकुञ्जका अनुसार शरद ऋतुको भ्रमण सिजनमा २० हजार ५ सय ४५ बढी विदेशी पर्यटकले सगरमाथा क्षेत्र भ्रमण गरेका हुन् ।

 भदौ असोज र कार्तिक ३ महिनामा उक्त सङ्ख्यामा विदेशी पर्यटकले सगरमाथा क्षेत्र भ्रमणका लागी निकुञ्जमा अनुमति लिएको निकुञ्ज कार्यालयले जनाएको छ ।  कार्यालयका सूचना अधिकारी विवेक बैजुका अनुसार शरद ऋतुको पर्यटकीय सिजन अघि साउन महिनामा १ सय १७ विदेशी यहाँ आइपुगेका थिए । यस्तै भदौमा १ हजार ३ सय ३५, असोजमा ७ हजार ९ सय ६३, कार्तिकमा ११ हजार १ सय ३४ पर्यटक सगरमाथा क्षेत्र आइपुगेका हुन ।

यही समयमा २ हजार ७ सय ३२ नेपाली सगरमाथा क्षेत्र भ्रमणमा पुगेका छन् ।  यस्तै यही समयमा निकुञ्जले निकुञ्ज क्षेत्रको भ्रमण शुल्क बापत ५ करोड ३४ लाख बढी राजस्व समेत सङ्कलन गरेको छ । सूचना अधिकारी बैजुका अनुसार कार्यालयले ४ महिनामा भ्रमण प्रवेश शुल्क मार्फत कुल ३ करोड ३४ लाख ३६ हजार २ सय रुपैयाँ राजस्व सङ्कलन गरेको हो । जसमध्ये सबैभन्दा धेरै कार्तिक महिनामा राजस्व सङ्कलन भएको छ ।  उक्त महिनामा २ करोड ९५ लाख ५२ हजार ८२ रुपैयाँ राजस्व सङ्कलन गरेको थियो  ।

यस्तै असोज महिनामा २ करोड २ लाख ६९ हजार ७ सय ५६, भदौमा ३२ लाख ६८ हजार ३ सय ८७ रुपैयाँ राजस्व सङ्कलन भएको छ भने साउनमा सबैभन्दा कम ३ लाख ४५ हजार ९ सय ७५ रुपैयाँ राजस्व सङ्कलन भएको छ । सगरमाथा राष्ट्रिय निकुञ्ज क्षेत्रमा विश्वकै प्रमुख पर्यटकीय गन्तव्य सगरमाथा हिमाल पर्ने भएकाले पनि यहाँ पर्यटकीय सिजनमा घुम्न आउने पर्यटकको लर्को लाग्ने गरेको छ ।