नेचासल्यानमा आयोजित वडा स्तरीय हाजिरीजबाफमा वडा नम्बर ५ प्रथम 

मंसिर २४, सोलुखुम्बु ।  लैङ्गिक हिंसा विरुद्धको १६ दिने अभियानको १५ औँ दिन आज नेचासल्यान गाउँपालिकामा वडा स्तरीय हाजिरीजबाफ कार्यक्रमको आयोजना गरिएको छ । गाउँपालिकाको आयोजनामा भएको वडा स्तरीय हाजिरीजबाफ प्रतियोगितामा ५ वटा वडा रहेको गाउँपालिकाका ४ वटा वडाको सहभागितामा हाजिरीजबाफ प्रतियोगिता सञ्चालन गरिएको हो ।

गाउँपालिका उपाध्यक्ष विना राईको अध्यक्षतामा आयोजित कार्यक्रमका बीच सम्पन्न प्रतियोगिताको प्रथम स्थान वडा नम्बर ५ ले हात पारेको जनाइएको छ ।  प्रथम स्थान हासिल गर्न सफल वडा नम्बर ५ ले पुरस्कार राशि ५ हजारको साथमा प्रमाणपत्र प्राप्त गरेको छ ।  यस्तै प्रतियोगिताको दोश्रो स्थान वडा नम्बर ४ ले हात पारेको छ भने तेश्रो स्थान वडा नम्बर ३ र सान्त्वना वडा नम्बर २ हुन सफल भएका सहकर्मी धन कुमार ढुङ्गेलले बताउनुभयो ।

द्वितीय, तृतीय र सान्त्वना हुने वडाको टिमले पुरस्कार राशि क्रमशः ३ हजार ५ सय २ हजार ५ सय र १ हजार ५ सयको साथमा प्रमाणपत्र प्राप्त गरेको उहाँले बताउनुभयो । गाउँपालिकाले लैङ्गिक हिंसा विरुद्धको १६ दिने अभियान विभिन्न कार्यक्रम गरि निरन्तर मनाइरहेको छ ।  

सोमबार आयोजित हाजिरीजबाफ प्रतियोगितामा गाउँपालिकाका प्रमुख प्रशासकीय अधिकृत विशाल घिमिरेको प्रमुख आतिथ्यता रहेको जनाइएको छ भने विभिन्न वडाका वडा अध्यक्षहरु, गाउँपालिकाका कार्यपालिका सदस्यहरू, शाखाप्रमुख तथा कर्मचारी लगायतको उपस्थिति रहेको थियो ।  गाउँपालिकामा लैंङ्गिक हिंसा विरुद्धको १६ दिने अभियान मङ्गलबार समापन हुँदैछ ।