साेलुखुम्ब जिल्ला प्रशासनले दियो उपचाररत कैदीलाई नागरिकता 

मंसिर २७, सोलुखुम्बु ।  जिल्ला प्रशासन कार्यालय सोलुखुम्बुले एक कैदीबन्दीलाई नागरिकता वितरण गरेको छ ।  एक अपराधमा पुर्पक्षमा लागी थुनामा रहकी महिलालाई जिल्ला प्रशासन कार्यालय सोलुखुम्बुले नागरिकता वितरण गरेको हो ।  

जिल्लाको माप्य दुधकोशी गाउँपालिका वडा नम्बर ५ घर भई टाक्सिन्दुका एक पुरुषसँग विवाह गरि आएकी रञ्जु बिकलाई नागरिकता प्रदान गरिएको हो । प्रमुख जिल्ला अधिकारी अनोज कुमार घिमिरेले जिल्ला कारागार अनुगमन गर्ने क्रममा नागरिकता नभएको जानकारी पाएपछि उनको नागरिकता बनाइएको हो ।  कैद भुक्तान गर्नका लागी करिव ३ महिना अघि कारागार चलान भएकी रञ्जुको अचानक स्वास्थ्यमा समस्या आएपछि उनलाई जिल्ला अस्पताल फाप्लु लगिएको थियो ।

 अस्पतालले स्वास्थ्योपचार गर्न अन्यत्र रेफरी गर्ने सुझाव दिएपछि अन्यत्र लैजान नागरिकता आवश्यक पर्ने भएकाले उनको नागरिकता बनाएर जिल्ला अस्पतालमा उपचार कक्षमै गएर नागरिकता दिइएको हो ।  नागरिकता प्राप्त गरेपछि कैदी विकले आफूलाई सहज हुने बताएकी छन् ।  उनले नागरिकता नहुँदा विभिन्न समस्या भोगिरहनुपरेको भन्दै अव स्वास्थ्योपचार लगायतमा सहज हुने बताएकी छन् ।  

उनलाई नागरिकता प्रदान गर्नका लागी जिल्ला प्रहरी कार्यालय सोलुखुम्बुका प्रमुख द्वारीका प्रसाद घिमिरे, सशस्त्र प्रहरी कार्यालय सोलुखुम्बुका प्रमुख गोविन्द पोखरेल, नेपाली सेनाका सेनानी लगायतको उपस्थिति रहेको थियो ।