खोटाङको जन्तेढुंगा ३ काहुलेमा एक घर जलेर नष्ट

पौष ३, सोलुखुम्बु । खोटाङमा आगलागीबाट एक घर जलेर नष्ट भएको छ । जन्तेढुङगा गाउँपालिका वडा नम्बर–३ काहुलेस्थिका शिवजी राईको घर आगलागीबाट जलेर नष्ट भएको हो ।

काठको खम्बा लगाइएको ढुंगामाटोको गारो तथा खरको छानो भएको दुइ तले घरमा मंगलबार अपरान्ह करिव ३.४५ बजे आगलागी हुँदा घरमा भएका अन्नपात, लत्ता कपडा, भाँडाकुँडा लगायत नगद रकम र अन्य सामाग्रीहरु जलेर नष्ट भएको जन्तेढुंगा गाउँपालिका वडा नम्बर ३ का वडा अध्यक्ष तारामान राईले बताउनुभयो ।

आगलागीका कारण घरसँगै भित्र राखिएका लत्ताकपडा अन्दाजी ५० हजार बराबरको, भाँडावर्तन अन्दाजी ३० हजार बराबर, अन्न २० हजार बराबर, सोलार प्यानल अन्दाजी अन्दाजी ४० हजार बराबर, चाँदी १० तोला र नगद २० हजार रुपैयाँ जलेर क्षति पुगेको जिल्ला प्रहरी कार्यालय खोटाङका सूचना अधिकारी मोहन पोखरेलले जानकारी दिनुभयो ।

राईको परिवार बस्दै आएको घर समेत जलेर पूर्ण नष्ट हुँदा जम्मा ४ लाख बराबर क्षति भएको प्रहरीले जनाएको छ । घटनाको जानकारी प्राप्त हुनसाथ इलाका प्रहरी कार्यालय चिसापानीबाट प्रहरी टोली घटनास्थलमा पुगेर घर पूर्ण रुपमा जलिसकेको अवस्थामा स्थानीयवासी लगायत अन्य जनप्रतिनिधिहरुले आगो निभाउन सफल भएको बताईएको छ ।