नेविसंघ अध्यक्ष डुजाङ शेर्पामाथि चन्दा असुलीको आरोप

पुष ४, साेलुखुम्बु । नेविसंघ अध्यक्ष डुजाङ शेर्पाले शैक्षिक संस्थाहरुमा चन्दा असुली धन्दा चलाएको भन्दै नेविसंघका केन्द्रिय सदस्यहरुले आपत्ति जनाएका छन् । बुधबार एक प्रेस विज्ञप्ती जारी गर्दै नेविसंघमा संस्थापन इतर समूहका विद्यार्थी नेताहरुले संगठनको गरिमालाई धमिल्याउने गरि निजी शैक्षिक संस्थाहरुमा अध्यक्ष शेर्पाले चन्दा असुली गरेको भन्दै गम्भिर आपत्ति जनाएका हुन् ।

अध्यक्षको गतिविधिले संगठनभित्र विवाद सिर्जना गराउने र केन्द्रिय कार्यसम्पादन समितको निर्णयलाई अवज्ञा गरेको आरोप लगाइएको छ । विज्ञप्तीमा भनिएको छ, ‘वर्तमान ने.वि. संघको केन्द्रीय अध्यक्षको गतिविधिले संगठन भित्र विवाद सृजना गराउन, केन्द्रीय कार्य सम्पादन समितिको निर्णयलाई अवज्ञा गर्ने, सिंगो संगठनको गरिमालाई धमिल्याउने निजि शैक्षिक संस्थाहरूमा संघका नाममा चन्दा असुली गर्ने, देशभरि संगठनलाई धरासायी बनाउदै संगठनको अस्तित्व कोमामा पुग्ने परिस्थिति निर्माण भइरहेको प्रति हामी केन्द्रिय कार्य समितिका सदस्यहरूको गम्भीर ध्यानाकर्षण भएको छ ।’

साथै अध्यक्ष शेर्पाले केन्द्रिय सदस्यहरुलाई आफुखुसी जिल्लामा केन्द्रिय प्रतिनिधि तोकी पठाइएको सम्बन्धमा सदस्यता वितरण सम्बन्धि व्यवस्थाको प्रतिकुल हुने गरि काम गरेको र जिल्ला समिति, पालिका समिति र क्याप्स ईकाई समितिको अधिकारलाई कुण्ठित गरिएको भन्दै उनीहरुले खेद प्रकट गरेका छन् । ‘अध्यक्ष दुजाङ शेर्पाले २०८१ पौष २ गते सदस्यता वितरण सम्बन्धमा संघका केन्द्रीय सदस्यहरूलाई केन्द्रीय प्रतिनिधि तोकी पठाइएको भन्ने परिपत्र ने.वि संघको हाल मौजूदा विधान २०७५ को सार्तौ संशोधन वमोजिम भाग २ को धारा ५ मा सदस्यता वितरण सम्बन्धी व्यवस्थाको प्रतिकुल हुने गरी नेपाल विद्यार्थी संघको जिल्ला समिति, पालिका समिति, क्याम्पस इकाई समितिको अधिकारलाई पनि कुण्ठित गर्ने कार्य प्रति खेद प्रकट गर्दछौ’ जारी ज्ञिप्तीमा उल्लेख छ ।

नेविसंघ केन्द्रिय सदस्य प्रेमिका राणा मगरद्वारा हस्ताक्षरित विज्ञप्तीमा नेविसंघको न्यूनतम मर्यादाभित्र रहि मुल्य मान्यताको राजनीति गर्न र १२ औँ महाधिवेशन हुन नदिने षड्यन्त्र प्रति सचेत र सजग रहन देशभरका महाधिवेशन पक्षधर विद्यार्थीहरुलाई आग्रह गरिएको छ ।