सिमा प्रशासन कार्यालय नाम्चेकाे सेवा ४ महिनादेखि सेवा ठप्प

पौष ५, सोलुखुम्बु ।  हिमाली जिल्ला सोलुखुम्बुमा रहेको सिमा प्रशासन कार्यालय नाम्चे ४ महिना देखी कार्यालय प्रमुख विहीन बनेको छ ।  गत भदौमा शाखा अधिकृत रूपेश विश्वकर्माको जिल्ला प्रशासन कार्यालय सरुवा भएपछि उक्त कार्यालय, कार्यालय प्रमुख विहीन बनेको हो । कार्यालय प्रमुखको सरुवा भएपछि खुम्बु पासाङ ल्हामु गाउँपालिका बासीले नागरिकता पाउनै मुस्किल हुने गरेको छ ।  शाखा अधिकृत कार्यालय प्रमुख रहने दरबन्दी रहेको कार्यालयमा अधिकृतको सरुवा भएपछि उक्त अड्डा ४ महिना देखी कार्यालय प्रमुख विहिन बनेको बताइएको छ ।

  कर्मचारीको सरुवा भएपछि अहिले सिमा प्रशासन कार्यालय नाम्चे सहायक कम्प्युटर अपरेटरको भरमा चल्दै आएको छ ।  करिव १० जना कर्मचारीको दरबन्दी रहेको कार्यालय अहिले ३ जना कर्मचारीको भरमा छ । हाल कार्यालयमा १ जना सहायक कम्प्युटर अपरेटर, १ जना दर्ता अपरेटर र १ जना कार्यालय सहयोगी मात्रै छन् । उनीहरू पनि “रानो विनाको मौरी” जस्तो बन्नु परेको कर्मचारीले बताएका छन् ।  कार्यालय प्रमुख नभएपछि भएका ३ जना कर्मचारीले पनि विगत २ महिनादेखि तलब सम्म नपाएको बताएका छन् ।

 कार्यालय प्रमुखको सिफारिसमा लोखापालले तलबको भुक्तानी गर्नुपर्ने प्रशासनिक झमेलामा कार्यालयका कर्मचारी पालिनुपरेको उनीहरूले बताएका छन् ।  यस बाहेक कार्यालय प्रमुख नहुँदा खुम्बु क्षेत्रका नागरिकले नागरिकता, राष्ट्रिय परिचयपत्र, संस्था नवीकरण, शरणार्थी परिचयपत्र नवीकरण लगायतका काम गर्न हजारौँ खर्च गरेर जिल्ला प्रशासन कार्यालय सल्लेरी आउनुपर्ने बाध्यता रहँदैआएको छ । खुम्बुका ५ वटा वडाका नागरिक सहित साविकको नाङ्पाला नाकालाई सेवा दिने प्रयोजनार्थ स्थापना भएको सिमा प्रशासन कार्यालय अहिले कर्मचारी नहुँदा खोल्ने र बन्द गर्ने दैनिकीमै चलिरहेको छ ।

 सिमा प्रशासनमा सेवा ठप्प हुँदा खुम्बु क्षेत्रका नागरिकले ४ दिनको पैदल हिँडाइ अथवा हजारौँको हेलिकप्टर भाडा तिर्नुपर्ने सरकारी बाध्यता झेल्दै आएका छन् ।  सरुवा भएर कर्मचारी गएपछि अर्को कार्यालय प्रमुख पठाउन गृह मन्त्रालयले चासो नदिएको कार्यालयका कर्मचारीहरू बताउँछन । गृह मन्त्रालयले खटाउने प्रयत्न गरेपनि भौगोलिक कठिनाइ र उच्च हिमाली क्षेत्र भएकाले कर्मचारी जानै नमान्नाले पनि समस्या भएको कार्यालयका सहायक कम्प्युटर अपरेटर कमल नकालले बताउनुभयो ।  कार्यालयमा शाखा अधिकृत १, लेखापाल र सहलेखापाल २, खरिदार १, नासु १, सहायक कम्प्युटर अपरेटर, १ दर्ता अपरेटर १, दर्ता सहायक १ र कास २ गरि १० जना कर्मचारीको दरबन्दी छ ।