ओर्लाङघाटमा ह्युम पाइप राखियाे, सल्लेरी-माप्य हुँदै खुम्बु जाने सडक शनिबारबाटै सञ्चालन

पौष ६, सोलुखुम्बु ।  साेलुखुम्बुको खुम्बु पासाङल्हामु गाउँपालिका सडक सञ्जालसँग जोडिएको छ ।  माप्य दुधकोशी गाउँपालिका र सोलुदुधकुण्ड नगरपालिकाको सिमानामा रहेको ओर्लाङघाटमा शनिबार ह्युम पाइप राखी सकिएसँगै सल्लेरी— खुम्बु सिधा सडक सञ्चालनको बाटो खुलेको हो ।  गत साउन ३२ गते थामेमा आएको बाढीका कारण माप्य दुधकोशी र खुम्बु जोड्ने मितेरी पुल क्षतिग्रस्त बन्दा  विच्छेद भएको सल्लेरी खुम्बु सडक सम्बन्ध ह्युम पाइप राखिएसँगै फेरि स्थापित भएको छ । 

सल्लेरी खुम्बु अस्थाई सडक खुलाउन ३ वटा स्थानीय सरकारको साझेदारी रहेको छ । ह्युम पाइप राखिने स्थानसम्मको सडक ट्रयाक खन्ने कार्यका लागि जग्गाको व्यवस्थापन सोलुदुधकुण्ड नगरपालिकाले गरेको थियो भने ३ किलोमिटर सडक खन्ने काम माप्यदुधकोशी गाउ“पालिका र ह्युम पाईप राख्ने काम खुम्बुपासाङल्हमु गाउँपालिकाले गरेको हो । बाढीले पुलमा क्षति गरेसँगै २ पालिकाको लागत साझेदारीमा अस्थाई रुपमा सवारी साधन आवत जावत शुरु गराइएको माप्यदुधकोशी गाउँपालिका अध्यक्ष बुद्धिकिरण राईले बताए ।

अध्यक्ष राईका अनुसार १६ वटा ह्युम पाइप राख्ने खर्च खुम्बुपासाङल्हमु गाउँपालिकाले गरेको र दुधकोशी नदि वारी र पारी समेत गरि ३ किलोमिटर नया“ ट्रयाक खन्ने काम माप्य दुधकोशी गाउँपालिकाले गरेको हो । बारम्बारको कोसिस पछि खुम्बु क्षेत्रमा सिधा सवारी आवतजावत गराउन सफल भएको खुम्बुपासाङल्हमु गाउँपालिकाका प्रबक्ता ल्हाक्पाछिरि शेर्पाले बताए । खुम्बु क्षेत्रका नागरिक सडक यातायातबाट विमुख भए पछि जनताको समस्यालाई मध्यनजर गरेर नगरपालिका क्षेत्रको जग्गा व्यवस्थापनमा सहजिकरणको गरेको सोलुदुधकुण्ड नगरपालिकाका मेयर नाम्गेल जाङ्बु शेर्पाले बताए । 

पर्यटकीय क्षेत्र खुम्बुमा स्थायी रुपमा यातायात सञ्चालनका लागि अहिले २ स्थानमा नै मोटरेबल पुल निर्माणको कसरत भइरहेको छ । थामेबाढीले क्षति गरेको मितेरी पुलको पुननिर्माणमा २ वटा गाउँपालिका लागिपरेका छन् भने सोलुदुधकुण्ड नगरपालिकाले वडा नम्बर १ टाक्सिन्दु र जुभिङ जोड्ने दुधकोशी नदी माथिको छिर्दिघाट मोटरवेल पुल निर्माणको काम ९५ प्रतिशत सकिएको जनाएको छ ।