नेले–मुक्लि सडक कालोपत्रे शुरु, पालिका अध्यक्ष राईले गरे शिलान्यास

७ पुष, सोलुखुम्बु । सोलुखुम्बुको थुलुङदुधकोशी गाउँपालिका वडा नम्बर १ नेले देखि पालिका केन्द्र मुक्लि सम्मको सडक कालोपत्रेको शिलान्यास गरिएको छ । ३ बर्ष अगाडी देखि पालिकाले पहल शुरु गरेको उक्त सडकको ठेक्का सम्झौता भएसँगै पालिका अध्यक्ष असिम राईले आईतबार शिलान्यस गरेका छन् ।

नेले बजारमा आयोजित कार्यक्रममा कालोपत्रे शुरु गर्ने स्थानमा पालिकाका सरोकारवालाहरुका बिचमा अध्यक्ष राईले रिवन काटेर कालोपत्रेको शिलान्यास गरेका हुन् । कोशी प्रदेश सरकार मातहत रहेको पुर्वाधार विकास कार्यालय ओखल्ढुंगाले निकालेको ठेक्का पुष्पाञ्जली कन्ष्ट्रक्सन प्रा.लि.ले पारेसँगै कालोपत्रेको शिलान्यास गरिएको हो । ३ बर्ष भित्र काम सम्पन्न गर्ने गरि उक्त कम्पनीले १० किलोमिटर सडक कालोपत्रेका लागि ४१ करोड १८ लाख ४८ हजार ४ सय ३६ रुपैयाँमा सम्झौता गरेको हो ।

शिलान्यास कार्यक्रमलाई सम्बोधन गर्दै पालिका अध्यक्ष राईले आफ्नो अघिल्लो कार्यकालमै प्रदेश सरकारका तत्कालिन आर्थिक मामिला मन्त्री ईन्द्र आङ्बोसँगको पहलमा योजनामा बजेट विनियोजन गरेपनि त्यसपछि बनेको सरकारले योजनानै कटाईदिएपछि अदालतमा गएर कालोपत्रे योजना फिर्ता ल्याउन सफल रहेको बताए । अध्यक्ष राईले नमुना पालिका निर्माण अभियानमा पालिका केन्द्रसम्म सडक कालोपत्रेको काम विकास रणनितिका दृष्टिकोणले निकै महत्वको रहेको धारणा राखे । कार्यक्रममा पालिका उपाध्यक्ष सविता राईले पालिका केन्द्रसम्म सडक कालोपत्रे भएसँगै विकासको मुल फुट्ने र हजारौँ जनता लाभान्वित हुने बताईन् ।

वडा नम्बर १ नेलेका अध्यक्ष घनराज सुनुवारले पालिका नेतृत्वको दुरदर्शिता र पहलकदमिकै कारण नेले–मुक्लि सडक कालोपत्रे सम्भव भएको भन्दै यसको पूर्णताका लागि सबै पक्ष लागि पर्नु पर्ने बताए । पालिका प्रबक्ता तथा वडा नम्बर ७ का वडा अध्यक्ष भोजराज कार्कीले यो सडकले कोशी पारिका जनताको स्तर उकास्ने विचार ब्यक्त गरे । निर्माण कम्पनीका संचालक बेदराज थापाले आफु पालिकाबासि नागरिक भएकाले पनि ३ बर्षको सम्झौता भए पनि २ बर्षमै निर्माण सम्पन्न गर्ने प्रतिबद्धता ब्यक्त गरे ।