लिखुपिके क्षेत्रको सडक मर्मतमा जुट्दै दुई स्थानीय तह

पौष ९, सोलुखुम्बु । लिखुपिके क्षेत्रको सडक मर्मतका लागि सोलुखुम्बुका दुई स्थानीय तह जुटेका छन् । सोलुबासीहरुलाई काठमाण्डौसम्म सहज आवतजावत गराउने हेतुले सोलुदुधकुण्ड नगरपालिकाबाट लामाजुरा – लिखुपिके – जिरी हुँदै काठमाण्डौ जोड्ने सडकको मर्मत तथा सम्हारमा सोलुदुधकुण्ड नगरपालिका र लिखुपिके गाउँपालिका जुटेका हुन् ।

गत असोज ११, १२ र १३ गते आएको भीषण वर्षाको कारण बाढी पहिरोले क्षती पुगेको वि.पि. राजमार्ग अन्तरगत घुर्मी – खुर्कोट – नेपालथोक सडक बर्खायाममा सुचारु हुने कुनै सम्भावना नदेखिएको भन्दै वैकल्पिक बाटोका लागि उक्त सडक मर्मतको काम सुरु गरिएको सोलुदुधकुण्ड नगरपालिकाका मेयर नाम्गेल जाङ्बु शेर्पाले बताउनुभयो ।

सडक सोलिङका लागि नगरपालिकाले मेसिनरी सामाग्री र लिखुपिके गाउँपालिकाले तेल उपलब्ध गराएको बताईएको छ । लिखुपिके ५ लामाजुराबाट सडक मर्मत कार्य सुरु गरि सबै वडाको सोलिङ कम्प्याक्सन गरिने लिखुपिके गाउँपालिकाकी अध्यक्ष मिना कार्की बस्नेतले जानकारी दिनुभयो ।