टाक्सिन्दुमा नेपाली कांग्रेसको १०० दिने विषेश अभियान

पौष ११, सोलुखम्बु । सोलुखुम्बुको सोलुदुधकुण्ड नगरपालिका वडा नम्बर १ टाक्सिन्दुमा नेपाली कांग्रेसको १०० दिने विषेश अभियान सम्पन्न भएको छ । नेपाली कांग्रेस वडा कार्यसमिति सोलुदुधकुण्ड नगरपालिका १ को आयोजनामा १०० दिने विषेश अभियान सम्पन्न भएको हो ।

बिहिबार वडा कार्यसमितिका सभापति छोङबा लामा शेर्पाको सभापतित्व तथा नेपाली काग्रेस जिल्ला सभापति नाम्गेल जाङ्बु शेर्पा प्रमुख आतिथ्यतामा १०० दिने अभियान सम्पन्न गरिएको जनाइएको छ । कार्यक्रमलाई सम्बोधन गर्दै जिल्ला सभापति नाम्गेल जाङ्बु शेर्पाले वडा देखि पालिका स्तर सम्म नेपाली काग्रेंसलाई मजबुद बनाउदै लैजाने बताउनुभयो । उहाँले पार्टी भित्र देखिएका असन्तुष्टिहरूलाई पनि अभियानले सम्बोधन गर्ने बताउनुभयो । अभियानमा जिल्ला, नगर र वडा स्तरमै विभिन्न कार्यक्रम गर्ने पनि उहाँले बताउनुभयो ।

उक्त अभिायानमा प्रदेश सभा ख का सभापति कर्मा शेर्पा, नगर सभापति सोनाम शेर्पा, महाधिवेशन प्रतिनिधि धर्म बहादुर नेपाली, जिल्ला नेता दावा गेलु पार्खिन, जिल्ला समितिले खटाएको प्रतिनिधी सरला नाछिरिङ, युवा नेता बालकुमार कार्की लगायतको उपस्थिति रहेको थियो । यसैबिच नेपाली कांग्रेस सोलुदुधकुण्ड नगरपालिका कार्यसमितिले वृहत कार्यक्रमको आयोजना गर्ने भएको छ ।

१०० दिने घरदैलो जागरुक अभियान अन्तर्गत यहि पुस १४ गते सोलुखुम्बुको सल्लेरीमा विशेष कार्यक्रमको आयोजना गरेको हो । कार्यक्रममा पार्टीका पूर्व महामन्त्री तथा नेपाल सरकारका उपप्रधान एवं सहरी विकास मन्त्री प्रकाशमान सिंहको प्रमुख आतिथ्यता रहने नगरसभापति सोनाम ग्याल्जेन शेर्पाले जानकारी दिनुभयो ।

त्यस्तै केन्द्रीय कार्यालयबाट सोलुखुम्बु जिल्लाका लागि खटिएका पार्टी प्रतिनिधि एवं केन्द्रीय सदस्य अमृत अर्याल, पुर्वमन्त्री तथा पार्टी केन्द्रीय सदस्य बल बहादुर केसी, केन्द्रिय सदस्य आङ गेलु शेर्पा, पार्टीका जिल्ला सभापति नाम्गेल जाङ्बु शेर्पा लगायतका नेताहरुको पनि उपस्थिति रहने सभापति शेर्पाले बताउनुभयो । जिल्ला समन्वय समितिको प्रांगणमा हुने उक्त कार्यक्रममा उपस्थित हुन सम्बद्ध सबैलाई नगरसमितिले अनुरोध गरेको छ ।