आँखाको परीक्षणका लागी सोलुमा  “टेलिअप्थाल्मोलोजि” सेवा

जेठ ४, सोलुखुम्बु । हिमाली जिल्ला सोलुखुम्बुमा आँखाको समस्या पहिचानका लागी नयाँ प्रविधि टेलि अप्थाल्मोलोजि ल्याइएको छ ।  जिल्ला सामुदायिक आँखा केन्द्र सोलुखुम्बुमा आँखा स्वास्थ्य सम्बन्धी समस्यालाई सिधै विशेषज्ञको मा देखाएर उपचार गर्नका लागी उक्त मेसिन जिल्लामा पहिलो पटक फाप्लुमा ल्याइएको छ ।

हिमालयन क्याटरेक्ट प्रोजेक्टको आर्थिक सहयोग तथा तिलगंगा आँखा प्रतिष्ठान काठमाण्डौको सहकार्यमा जिल्लामा यो मेसिन ल्याइएको जिल्ला सामुदायिक आँखा केन्द्र फाप्लुका व्यवस्थापन समिति अध्यक्ष ङिमा तेण्डुप शेर्पाले बताउनुभयो । उहाँले फाप्लुबाटै टेलिअप्थाल्मोलोजि प्रविधिबाट आँखाको भित्री भाग सम्मको तस्विर खिचेर सिधै तिलगंगा आँखा प्रतिष्ठान पठाइने भएकाले  आँखाको समस्या देखाउनका लागी मात्रै अव हजारौँ खर्च गरेर अन्यत्र धाउनुनपर्ने बताउनुभयो ।

यसैबीच केन्द्रबाट  बाट ४ हजार बढी विरामले आँखा उपचार सम्बन्धी सेवा पाएका छन ।  सन २०२४ को जनवरी देखी हाल सम्मको अवधि ५ महिनामा जिल्लाका ४ हजार ४ सय ४११ जना विरामको आँखा जाँच, शल्यक्रिया तथा औषधी र चश्मा वितरण गरिएको जिल्ला सामुदायिक आँखा केन्द्रले जनाएको हो । जिल्ला सामुदायिक आँखा केन्द्र फाप्लुका अनुसार आँखा केन्द्र फाप्लु, ४ वटा ग्रामीण आँखा केन्द्र, आँखा शिविर र विद्यालयहरूमा गएर प्रदान गरिएको सेवाबाट हाल सम्म ४ हजार ४ सय ११ जनाले सेवा पाएका हुन ।  

सन् २०२४ को ५ महिनामा जिल्ला सामुदायिक आँखा केन्द्रबाट १ हजार ७ सय १२ जनाले सेवा लिएका छन ।  यस्तै ग्रामीण आँखा केन्द्रबाट ८ सय २४ जनाले, केन्द्रले सञ्चालन गरेको आँखा शिविरबाट १ हजार २ सय ६० जनाले र विद्यालयमा गएर प्रदान गरिएको आँखा सम्बन्धी सेवाबाट २ सय २४ जनाले सेवा प्राप्त गरेको जिल्ला सामुदायिक आँखा केन्द्रका प्रमुख विधान ताम्राकार ले जानकारी दिनुभयो ।

यि मध्ये ८७ जना बिरामीको आँखा शल्यक्रिया गरिएको, ४२ जना आँखाका बिरामीको कसिंगर निकालिएको प्रमुख ताम्राकारले बताउनुभयो ।