लिखुपिकेमै पहिलो पटक दन्त सेवा इकाइको उद्घाटन 

जेठ ४, सोलुखुम्बु । सोलुखुम्बुको लिखुपिके गाउँपालिकामा दन्त सेवा इकाई सुरु गरिएको छ । बिहीबार गाउँपालिका अध्यक्ष मिना कार्की बस्नेतले उद्घाटन गरेपछि गाउँपालिकामै पहिलो पटक दन्त सेवा सुरु भएको हो । गाउँपालिकाको वडा नम्बर ३ चौलाखर्कबाट सेवा प्रवाह हुनेगरि इकाई सुरु भएको जनाइएको छ ।  

गाउँपालिकाको १३ लाख रुपैयाँ बजेटमा दन्त सेवा इकाई सुरु भएको गाउँपालिकाका प्रमुख प्रशासकीय अधिकृत काजिमान राईले बताउनुभयो । स्थानीय तहमै दन्तसेवा सुरु भएपछि दाँत सम्बन्धी सामान्य उपचार र चेकजाँचका लागी पालिका बाहिर वा काठमाण्डु  जानुपर्ने बाध्यताको अन्त्य हुने गाउँपालिका अध्यक्ष मिना कार्की बस्नेतको भनाई छ ।

अहिले दन्त सेवा इकाई गाउँपालिकाले भाडाको घरबाट सुरु गरेको छ । निकट भविष्यमा गाउँपालिकाको अस्पताल निर्माण भइसकेपछि सोही अस्पतालबाट सुचारू गरिने भन्दै यो सेवालाई थप व्यवस्थित र स्तरोन्नति गर्दै लगिने अध्यक्ष बस्नेतले बताउनुभयो । दन्त सेवा इकाइमा अहिले एक जना दन्त हाइजेनिष्ट रहेर सेवा प्रदान गर्नेछन् ।

अव दन्त सेवा इकाईले लिखुपिके का जनतालाई, दाँत सफा गर्ने, भर्ने, फुकाल्ने, राख्ने जस्ता सेवा दिइने दन्त हाइजेनिष्ट अस्मिता ढकालले बताउनुभयो । बाल बच्चाहरूको दाँत किराले खाने समस्या बढिरहेको बेला समयमा त्यसको उपचार नपाउँदा अधिक दुखाइ सहनुपर्ने र दाँत बिग्रिने समस्या अव यहाँका जनताले भा्ग्नु नपर्ने समेत उहाँको भनाई छ ।