खिजिदेम्बामा ट्याक्टर दुर्घटना, १ को मृत्यु, ११ घाइते

जेठ ४, सोलुखुम्बु । ओखलढुङ्गाको खिजीदेम्बा गाउँपालिकामा ट्याक्टर दुर्घटना हुँदा एक जनाको ज्यान गएको छ । शुक्रबार बिहान गाउँपालिकाको वडा नम्बरमा भएको दुर्घटनाबाट वडा नम्बर ३, सेनीका १८ वर्षीय आयुष सुनुवारको घटनास्थलमै ज्यान गएको र अन्य ११ जना घाइते भएका छन ।

ग्रिनभेन्चर हाइड्रो पावरका कामदार लिएर जाँदै गरेको को २ त ८६३६ नम्बरको ट्याक्टर गाउँपालिकाको वडा नम्बर १ अर्थिङ्गे मोडमा दुर्घटनामा परेको हो । गम्भीर घाइतेहरूलाई उपचारका लागी हेलिकप्टर मार्फत काठमाण्डु पठाउने तयारी भइरहेको खिजीदेम्बा गाउँपालिकाका अध्यक्ष गोम्बु शेर्पाले बताउनुभयो । उहाँले सामान्य घाइतेहरूलाई उपचारका लागी मन्थली पठाइएकाे जानकारी दिनुभयो ।

यस्तै पालिका अध्यक्ष राईले यो दुर्घटना हाइड्रो पावरको लापरवाहीका कारणले भएको बताउनुभएको छ । सामाजिक सञ्जाल फेसबुकमा घटना सम्बन्धी जानकारी दिँदै अध्यक्ष शेर्पाले कच्ची सडकमा तीब्र गतिमा सवारी सञ्चालन गर्नु, ट्याक्टरमा मजदुर कोच्याएर राख्नु उचित नभएको भन्दै मृतक परिवारलाई उचित क्षतिपूर्ति र घाइतेहरूको यथाशीघ्र उपचारका लागी ग्रिनभेन्चर हाइड्रो लिखु फोरलाई निर्देशनात्मक अनुरोध गर्नुभएको छ ।