काङ्ग्रेसको सय दिने अभियान माप्यमा, असन्तुष्टिहरूलाई चिरेर एकजुट हुनुपर्नेमा नेताहरूको जोड 

पौष १३, सोलुखुम्बु ।  नेपाली काङ्ग्रेसको जारी १ सय दिने विशेष अभियान माप्यमा पनि सम्पन्न भएको छ ।  नेपाली काङ्ग्रेसका केन्द्रिय सदस्य तथा पर्यटन विभाग प्रमुख आङगेलु शेर्पाको प्रमुख आतिथ्यतामा गाउँपालिकामा काङ्ग्रेसको १ सय दिने विशेष अभियान सम्पन्न भएको हो ।  विशेष अभियानको गाउँपालिका स्तरीय कार्यक्रमलाई सम्बोधन गर्दै नेताहरूले काङ्ग्रेसलाई एक ढिक्का बनाएर लैजानुपर्ने आवश्यकता रहेको बताउँदै मजबुत बन्नुपर्नेमा जोड दिएका छन् ।

जिल्ला सभापति तथा सोलुदुधकुण्ड नगरपालिकाका मेयर नाम्गेल जाङ्बु शेर्पाले पार्टी भित्र देखीएका असन्तुष्टिहरूलाई स्पटमै सम्बोधन गर्नलाई यो अभियान रहेको बताउँदै समस्यालाई समाधान गरे अगाडी बढ्नुको विकल्प नरहेको उल्लेख गर्नुभयो । कार्यक्रममा काङ्ग्रेस प्रदेश सभा (ख) का सभापति कर्मा शेर्पा, जिल्ला समितिबाट प्रतिनिधिको रुपमा माप्य खटिनुभएका नेता  दावा गेलु पाख्रीन लगायतको उपस्थिती रहेको नेपाली काङ्ग्रेस नेता तथा सोलुदुधकुण्ड नगरपालिका ६ का वडा अध्यक्ष  फुर्वा ग्याल्जेन शेर्पाले जानकारी दिनुभयो । यसैबीच नेपाली कांग्रेसका पूर्व महामन्त्री तथा वर्तमान सहरी विकास मन्त्री प्रकाशमान सिंह भोलि सल्लेरी आउँदै हुनुहुन्छ ।

 काङ्ग्रेसको १ सय दिने अभियान अन्तर्गत तय भएको कार्यक्रमलाई सम्बोधन गर्न आइतबार मन्त्री सिंह सल्लेरी आउने कार्यक्रम रहेको काङ्ग्रेसले जनाएको छ ।  त्यस्तै केन्द्रीय कार्यालयबाट सोलुखुम्बु जिल्लाका लागि खटिएका पार्टी प्रतिनिधि एवं केन्द्रीय सदस्य अमृत अर्याल, पूर्वमन्त्री तथा पार्टी केन्द्रीय सदस्य बल बहादुर केसी, केन्द्रिय सदस्य आङ गेलु शेर्पा, पार्टीका जिल्ला सभापति नाम्गेल जाङ्बु शेर्पा लगायतका नेताहरूको पनि उपस्थिति रहने जनाइएको छ  ।