नेचासल्यान २ मा नयाँ सहकारी खुल्यो, महिला सशक्तीकरणमा प्राथमिकता 

पौष १३, सोलुखुम्बु । सोलुखुम्बुको नेचासल्यान गाउँपालिका वडा नम्बर २ मा नयाँ सहकारी संस्था गठन भएको छ ।  नेपाल कृषि सहकारी सङ्घका केन्द्रिय अधिकारी सुमन बोहोराको उपस्थितिमा “जलदेबी साना किसान कृषि सहकारी संस्था सल्यान” को गठन गरिएको हो ।  गाउँपालिका अध्यक्ष धनजन राई तथा उपाध्यक्ष विना राईको  आतिथ्यतामा सम्पन्न एक कार्यक्रमका बीच गाउँपालिकाकाे वडा नम्बर १ र २ कार्यक्षेत्र सहने गरी सहकारीको गठन भएको हो ।  सहकारी संस्था गठन सहकारी संस्थाको औचित्य के ?, आवश्यकता किन भन्ने विषयमा केन्द्रिय अनुशरण अधिकृत बोहोराले स्पष्ट पार्नुभएको जनाइएको छ । नवगठित सहकारी महिला सशक्तीकरण केन्द्रित रहने गरि स्थापना भएको छ ।  उक्त सहकारीमा ८० प्रतिशत महिला र २० प्रतिशत पुरुष सम्मीलित सञ्चालन समिति गठन भएको छ   नवगठित सहकारीको सञ्चालन समिति अध्यक्षमा सविता बस्नेत चयन हुनुभएको छ ।  सहकारी गठन कार्यक्रममा गाउँपालिका अध्यक्ष राईले ऋण प्रवाह र असुलिमा ध्यान दिन, बजार व्यवस्थापन लगायत विषयमा संवेदनशिल हुनुपर्ने सुझाव दिनुभएको थियो ।  यस्तै उपाध्यक्ष विना राईले कृषि सहकारीले गाउँमा भएकाे कृषि उत्पादनकाे बजारीकरणमा सहजता हुने बताउनुभएकाे छ ।    यस्तै वडा नम्बर १ का अध्यक्ष रमेश कुमार राईले  समिति गठन गर्दा भूगोलको समाबेशितालाई ध्यान दिन सुझाव दिनुभएको थियो ।