चिसो भगाउन चोक चोकमा आगो बाल्दै सोलु प्रशासन, भाग्ला त जाडो ?

पौष १५, सोलुखुम्बु । हिमाली जिल्ला सोलुखुम्बुमा चिसो अत्याधिक बढेसँगै जाडो भगाउन जिल्ला प्रशासन कार्यालयले चोक चोकमा आगो बाल्न थालेको छ । सदरमुकाम सल्लेरीको तापक्रम माईनसमा झरेसँगै जनतालाई चिसोबाट जोगाउन वडा नम्बर ४ फाप्लु र वडा नम्बर ५ सल्लेरीका विभिन्न चोकमा सोमबार विहानै बाट आगो बाल्न थालिएको प्रमुख जिल्ला अधिकारी अनोजकुमार घिमिरेले बताउनुभयो ।

यस अघि जिल्ला विपद ब्यवस्थापन समितिको निर्णय अनुसार दाउराको ब्यवस्थापन गरि जनतालाई आगो तपाई एको प्रजिअ घिमिरेले बताउनुभयो । खुम्बु क्षेत्रमा पनि डिभिजन बन र निकुन्जसँग समन्वय गरेर मुख्य बस्तिहरुको चोकमा आगो बालिने जिल्ला प्रहरी कार्यालय सोलुखुम्बुका प्रमुख डिएसपि द्वारिकाप्रसाद घिमिरेले जानकारी दिनुभयो । सदरमुकाममा प्रहरीले ठाउँ ठाउँबाट दाउरा संकलन गरेर अभियानलाई निरन्तरता दिने डिएसपि घिमिरेले उल्लेख गर्नुभयो ।

विहानै पानी जम्ने सल्लेरीमा प्रशासनले आगो ताप्ने ब्यवस्था मिलाईदिए पछि नागरिकहरुले खुसी प्रकट गरेका छन् । सोलु प्रशासनले नयाँ अभियान स्वरुप आगो बाल्न थाले पछि चोकमा भेला भएर सबैलाई जाडो भगाउन सजिलो भएको स्थानीयको भनाई छ ।