जिल्ला अस्पताल फाप्लुमा मौसमी रुघाखोकीका बिरामी उच्च, सावधानी अपनाउन आग्रह

पौष १६, सोलुखुम्बु । जिल्ला अस्पताल फाप्लुमा रुघाखोकी तथा ज्वरोका बिरामीको सख्या बढेको छ । मौसममा आएको परिवर्तनसँगै अस्पतालमा रुघाखोकीका बिरामी बढेको अस्पतालले जनाएको छ । चिसो सिजन सुरु भएसँगै ज्वरो, रुघाखोकी, घाँटी दुख्ने, टाउको दुख्ने, झाडापखाला लगायतका बिरामी उपचारका लागि अस्पताल आउने गरेको जिल्ला अस्पताल फाप्लुका प्रमुख प्रशान्त शाहले बताउनुभयो ।

अस्पतालको ओपिडिमा दैनिक ६० देखि ७० प्रतिशतको हाराहारीमा बिरामीहरु आउने गरेका छन । चिसो मौसम सुरु भएकाले यतिखेर चिसोबाट हुने समस्याहरूबाट बच्नुपर्ने डाक्टरहरूको सुझाव छ । विशेष गरि रुघाखोकी, निमोनिया लगायतका समस्याले ग्रसित गराउने हुँदा तातो न्यानो भएर बस्न डाक्टर बाबुराम जोशीले अनुरोध गर्नुभएको छ । यस्तै थुलुङ दुधकोशी अस्पतालमा पनि चिसोजन्य रोगका बिरामी बढेका छन् । पालिका अस्पतालमा दैनिक ५ जना बढी बाल बच्चा लगायत बिरामीहरू चिसोजन्य समस्या लिएर आउने गरेको थुलुङ दुधकोशी अस्पतालका डाक्टर अजय चौधरीले बताउनुभयो । यस्तै चिसो बढेपछि दमको समस्या भएका बिरामीहरू पनि बढेको उहाँको भनाई छ ।

चिसोमा दमको समस्या भएका बिरामीहरूले ख्याल गर्नुपर्ने भएपनि चेतनाको कमीले गर्दा कम ख्याल गर्ने समस्या आउने करण दैनिक दम बल्झिने बिरामीहरू बढिरहेको डाक्टर चौधरीले बताउनुभयो । उहाँले चिसो मौसममा दम, रुघाखोकी, ज्वरो लगायतका स्वास्थ्य समस्या निम्तिने भएकाले विशेष हेरचाह गर्न पनि अनुरोध गर्नुभएको छ ।