‘अफ सिजन’मा सगरमाथा क्षेत्र भ्रमण गर्ने विदेशी पर्यटक बढे

पौष १९, सोलुखुम्बु । ‘अफ सिजन’मा सगरमाथा क्षेत्र भ्रमण गर्ने विदेशी पर्यटकको सङ्ख्या यस वर्ष वृद्धि भएको छ । विगतका वर्षहरुमा भन्दा यस वर्ष सिजन सकिएपछि पनि भ्रमण गर्न आउने विदेशी पर्यटक बढेको रहेको नेपाल नागरिक उड्डयन प्राधिकरण कार्यालय लुक्लाले जनाएको छ । पछिल्लो एक सातामा २ सय बढी विदेशी पर्यटक सगरमाथा क्षेत्र प्रवेश गरेका छन् । अफसिजनको समयमा एक सातामै २ सय २८ जना पर्यटकले सगरमाथा क्षेत्रको भ्रमण गरेका हुन् ।

नेपाल नागरिक उड्डयन प्राधिकरण कार्यालय लुक्लाको तथ्याङक अनुसार पुस ११ देखि १८ गतेसम्ममा ९१ महिला र १३७ पुरूष गरी २२८ जना विदेशी पर्यटक भ्रमणका लागि लुक्ला ओर्लिएका हुन्। पुस ११ गते २८, १२ गते ३१, १३ गते ३०, १४ गते ६६, १५ गते ३६, १६ गते १९, १७ गते चार र १८ गते १४ जना विदेशी पर्यटक सगरमाथा क्षेत्र भित्रिएका छन् । ‘अफ सिजन’मा सगरमाथा क्षेत्र भ्रमण गर्ने विदेशी पर्यटकको सङ्ख्या यस वर्ष वृद्धि भएको कार्यालयका इन्चार्ज जिनिश राजभण्डारीले जानकारी दिनुभयो । विगतका वर्षहरुमा भन्दा यस वर्ष सिजन सकिएपछि पनि भ्रमण गर्न आउने विदेशी पर्यटक बढेको उहाँको भनाई छ ।

गत वर्ष यही समयमा दैनिक १२/१४ जना मात्र विदेशी पर्यटकहरु मात्रै भ्रमणका लागि आउने गरेको खुम्बु क्षेत्रमा अहिले दैनिक २७/२८ जनासम्म भित्रिरहेको नागरिक उड्डयन प्राधिकरण कार्यालय लुक्लाले जनाएको छ । खुम्बुमा विशेष गरी वर्षको दुई सिजनमा पर्यटकको चाप हुने गर्दछ । ‘स्प्रिङ’ सिजनका रुपमा वैशाख, जेठ, असार र असोज, कात्तिक, मङ्सिरलाई मुख्य पर्यटकीय सिजनका रुपमा मानिन्छ । सिजनमा पर्यटकले भरिभराउ हुने सो क्षेत्रमा सिजन सकिएसँगै चहलपहल कम हुने गर्दछ । तर यस वर्ष भने सिजन सकिएपछि पनि फाट्टफुट्ट पर्यटकहरु आइरहेको जनाइएको छ ।