ओखलढुंगामा लगातार तीन दिन आगलागीका घटना, विषेश सावधानी अपनाउन प्रहरीको आग्रह

पौष २९, सोलुखुम्बु । ओखलढुगांमा लगातार तीन दिन आगलागीका घटना हुँदा लाखौको क्षति भएको छ । जिल्लाका विभिन्न ठाउँमा शुक्रबारदेखि निरन्तर आगलागीका घटिरहेको जिल्ला प्रहरी कार्यालय ओखलढुगांले जानकारी दिएको छ । जिल्लाको चम्पादेवि गाउँपालिका १० रानिवनका शिवहरी ढुंगेलको बाख्रा खोरमा गएराति चुलोबाट आगो सल्किदा बाख्राको खोर पुर्णरुपमा जलेर नष्ट भएको छ ।

आगलागीबाट गाह्रो र ढुंगाको छानो भएको दुई तले बाख्रा खोरमा बाँधि राखिएको बोका ३ वटा, बाख्रा ३ वटा गरी जम्मा ६ वटा मर्दा १५ लाख ५० हजार बराबरको क्षती भएको प्रहरीले जनाएको छ । आइतबार जिल्लाकै सुनकोशी गाउँपालिका वडा नम्बर ९ ककनीका मेख बहादुर तामाङको भान्सा घरबाट आगो सल्किदा १५ लाख बराबरको क्षति भएको छ । यस्तै खिजीदेम्बामा शुक्रबार मध्यराति आगलागी हुँदा ३ घर जल्दा २२ लाख १० हजार बराबरको क्षति भएको छ ।

आगलागीका घटना दिनप्रतिदिन बढ्दै गएकाले प्रहरीले आगोजन्य वस्तु सलाई, लाइटर, ग्यास सिलिन्डर र चुल्हो बालबालिकाबाट टाढै राख्न, सावधानीपूर्वक प्रयोग गर्न तथा काम सकिएपछि आगो निभाउन र अन्य वस्तु सुरक्षित रुपमा राख्न अनुरोध गरेको छ ।

यस्तै आगलागी वा धुँवा भएको ठाउँबाट बाहिर निस्कनुपर्दा घोप्टो परेर निस्कन, ग्यास सिलिन्डरमा आगो लागेमा जुटको बोरा वा ब्ल्याङ्केटले सिलिन्डरलाई घ्वाप्प छोप्न र ग्यास चुल्हो बाल्नु अगाडि भान्साको झ्याल, ढोका खोली ग्यास लिक भएरनभएको यकिन गरेर मात्र प्रयोग गर्न पनि प्रहरीको आग्रह हो । गाईवस्तु चरनका लागि राम्रो हुन्छ भनी वनमा डढेलो लगाउने काम नगर्न, वनमा बालेको आगो र चुरोटको ठुटो पूर्णरूपमा निभाउन प्रहरीले सचेत गराएको छ । प्रहरीले आगालागी भएको जानकारी हुनासाथ कन्ट्रोल १०० मा जानकारी गराउन अनुरोध गरेको छ ।