चिसोको कारण सोलुका विद्यालयहरू धमाधम बन्द हुँदै

पौष २९, सोलुखुम्बु । हिमाली जिल्ला सोलुखुम्बुमा शीतलहरसँगै चिसो बढेपछि विद्यालयहरू धमाधम बन्द हुन थालेका छन् । चिसोले गर्दा पठनपाठनमा समस्या भएपछि विद्यालयहरू धमाधम बन्द गर्न थालेका हुन् । ८ वटा स्थानीय तह मध्ये सोताङ पालिका बाहेक सबै स्थानीय तहले जाडोको बिदा दिएको जनाइएको छ ।

गत मंसिरदेखि विद्यालयहरु क्रमिक रूपमा बन्द हुन थालेको शिक्षा विकास तथा समन्वय इकाई सोलुखुम्बुले जनाएको छ । जिल्लामा हाल सम्म दुई सय ८९ वटा सामुदायिक विद्यालय रहेका छन् । तीमध्ये ९३ विद्यालयहरुमा अहिले पठनपाठन बन्द गरिएको हो । सोलुखुम्बुको माथिल्लो क्षेत्रको तापक्रम माइनस २० डिग्रीसेल्सियससम्म पुगेको छ भने सल्लेरी क्षेत्रमा पनि तापक्रम माइनसमा झरेको हावापानी मापन केन्द्र सल्लेरीले जनाएको छ ।

उच्च हिमाली क्षेत्रमा मंसिर दोस्रो साताबाट नै पानी जम्न थालेपछि जाडो बिदा दिइएको बताइएको छ । यतिबेला खुम्जुङलगायत क्षेत्रका बासिन्दासमेत जाडो छल्न अन्यत्र गएपछि त्यस क्षेत्र सुनसान बनेको छ ।