माघ १,सोलुखुम्बु । हिमाली जिल्ला सोलुखुम्बुमा आज राष्ट्रिय योग दिवस मनाइएको छ । जिल्ला आयुर्वेद स्वास्थ्य केन्द्र सोलुखुम्बुको आयोजनामा “स्वास्थ्य समाज, समृद्ध नेपाल र विश्व शान्तिका लागि योग” भन्ने मुल नारा सहित सल्लेरीमा दशौँ राष्ट्रिय योग दिवस मनाइएको हो । योगले मानसिक चिन्ता हटाई स्मृति, ज्ञान हासिल गर्न सक्ने जिल्ला आयुर्वेद स्वास्थ्य केन्द्र सोलुखुम्बुका सूचना अधिकारी केशब ढुगंनाले जानकारी दिनुभयो ।
योगको महत्वबारे सबैलाई थाहा दिने उदेश्यले हरेक वर्ष माघ १ गते राष्ट्रिय योग दिवस मनाइने गरिएको उहाँको भनाई छ । उक्त दिवसमा सहायक प्रमुख जिल्ला अधिकारी रुपेश विश्वकर्मा, जिल्ला प्रहरी कार्यालय सोलुखुम्बुका प्रहरी नायव उपरीक्षक द्धारिका प्रसाद घिमिरे, प्रहरी निरीक्षक प्रविन श्रेष्ठ, सशस्त्र प्रहरी बल नेपाल आश्रित गुल्म सोलुखुम्बुका सशस्त्र प्रहरी नायव उपरीक्षक गोविन्द पोखरेल लगायत विभिन्न संस्थाका प्रतिनिधीहरुको उपस्थिती रहेको थियो ।
२०७२ साल साउन २८ गतेको मन्त्रिपरिषद् बैठकले हरेक वर्ष माघ १ गते राष्ट्रिय योग दिवस मनाउने औपचारिक निर्णय गरी यसको संयोजन गर्ने जिम्मेवारी शिक्षा मन्त्रालयलाई दिएको थियो । यसअघि २०३६ सालदेखि उत्तरायण शुरू हुने दिन पारेर नेपालमा डा.हरिप्रसाद पोखरेलको सक्रियतामा योगको क्षेत्रमा काम गरेका संस्थाको सहभागितामा योग दिवस मनाउन थालिएको थियो । विश्व योग दिवस जुन २१ तारिखमा मनाइएपछि नेपालका अभियानकर्मीले माघ १ लाई राष्ट्रिय योग दिवस घोषणा गर्न शान्ति तथा पुनर्निर्माण मन्त्रालयमार्फत मन्त्रिपरिषद्मा प्रस्ताव गरेका थिए । आयुर्वेदलाई योगसँग जोड्न २०४८ चैत १५ गतेदेखि नरदेवी आयुर्वेद अस्पतालमा योगाभ्यास शुरू गरिएको थियो ।
स्वास्थ्यलाभ,मानसिक शान्तिका लागि योग अभ्यास गर्ने सङ्ख्या दिनप्रतिदिन बढ्न थालेको छ । योगा धेरै प्रकारका हुन्छन । योगका प्रकारः– १.राजयोग, २.हठयोग, ३.लययोग, ४. ज्ञानयोग, ५.कर्मयोग र ६. भक्तियोग। यसका साथै बहिरंग योग, नाद योग, मन्त्र योग, तन्त्र योग, कुण्डलिनी योग, साधना योग, क्रिया योग, सहज योग, मुद्रायोग, र स्वरयोग आदि योगका अनेक आयामहरूको चर्चा गरिन्छ तर यी सबै योगहरू माथि उल्लिखित छ प्रकारमा नै समाहित छन्। हामीले आफ्नो शरीरलाई स्वस्थ राख्न धेरै किसिममा प्राणायाम र योगासनहरु गर्न सक्छौं । जसले हामीलाई शारीरिक र मानसिक दुवैरुपमा बलियो बनाउँछ ।
Discussion about this post