सोलु प्रहरीले ‘चालकसँग दुई मिनेट कार्यक्रम’ लाई निरन्तरता दिदैँ

माघ ३, सोलुखुम्बु । हिमाली जिल्ला सोलुखुम्बुमा प्रहरीले सुरु गरेको ‘चालकसँग दुई मिनेट कार्यक्रम’ लाई निरन्तरता दिईरहेको छ । यस वर्षको पहिलो वर्षा तथा हिमपात भएसँगै सोलु प्रहरीले सुरु गरेको कार्यक्रमलाई निरन्तरता दिईरहेको जिल्ला प्रहरी कार्यालय सोलखुुम्बुका प्रहरी नायव उपरीक्षक द्धारिका प्रसाद घिमिरेले जानकारी दिनुभयो । वर्षासहितको हिमपातपछि सडकमा हिउँ तथा पानी जमेर धेरै चिप्लो र हिलाम्मे हुँदा दुर्घटनाको जोखिम बढ्ने भएकाले सुरक्षित यात्राका लागि सवारी चालकहरुसँग दुई मिनेट कार्यक्रम सुरु गरिएको उहाँको भनाई छ ।

जिल्लामा सवारी साधन भित्रिने तथा बाहिरिने मुख्य नाका पत्तालेलगायतका क्षेत्रमा प्रहरीले सुरक्षित यात्राका लागि सबै चालकहरुलाई रोकेर सम्भावित खतरा र सुरक्षित यात्राबारे दुई मिनेट सचेत गराउने कार्य भइरहेको छ । उक्त कार्यक्रम प्रहरी चौकी केरुङको पत्ताले र अस्थायी प्रहरी चौकी रमितेबाट सवारी चालकहरूसँग सचेतना कार्यक्रम सञ्चालन गरिरहेको बताइएको छ । त्यस क्षेत्रका विभिन्न सडक खण्डमा लामो समयसम्म हिउँ रहने तथा पानी जमेर बरफ बन्ने गर्दछ ।

यसअघिका वर्षहरुमा पनि चिप्लिएर दुर्घटना हुने गरेको थियो । अझ नियमित सञ्चालन हुने यातायातका साधनभन्दा यो सिजनमा पहिलो पटक पुग्ने यातायातका साधनलाई हिउँ पग्लिएर जमेको बरफमा हुने चिप्लोबारे पनि जानकारी नहुने भएकाले यो प्रभावकारी हुने बताइन्छ । सल्लेरीबाट राजधानीलगायत टाढाका लागि छुट्ने सवारी साधान बिहान झिसमिसेमै छुट्ने हुँदा बरफमा दुर्घटनाको जोखिम बढी हुने गरेको छ ।