सोलु प्रहरीको ‘चालकसँग दुई मिनेट कार्यक्रम’ प्रभावकारी बन्दै

माघ ५, सोलुखुम्बु । हिमाली जिल्ला सोलुखुम्बुमा प्रहरीले सुरु गरेको ‘चालकसँग दुई मिनेट कार्यक्रम’ प्रभावकारी बन्दै गएको छ । सडकमा हिउँ तथा पानी जमेर धेरै चिप्लो र हिलाम्मे हुँदा दुर्घटनाको जोखिम बढ्ने भएकाले सुरक्षित यात्राका लागि सवारी चालकहरुसँग दुई मिनेट कार्यक्रम प्रभावकारी बन्दै गएको जिल्ला प्रहरी कार्यालय सोलुखुम्बुका प्रहरी नायव उपरीक्षक द्धारिका प्रसाद घिमिरेले जानकारी दिनुभयो ।

कार्यक्रममा खटिएका प्रहरीहरु दिनरात नभनी अहोरात्र खटिरहेका छन् । जिल्लामा सवारी साधन भित्रिने तथा बाहिरिने मुख्य नाका पत्तालेलगायतका क्षेत्रमा प्रहरीले सुरक्षित यात्राका लागि सबै चालकहरुलाई रोकेर सम्भावित खतरा र सुरक्षित यात्राबारे दुई मिनेट सचेत गराउने कार्य भइरहेको छ । उक्त कार्यक्रम प्रहरी चौकी केरुङको पत्ताले र अस्थायी प्रहरी चौकी रमितेबाट सवारी चालकहरूसँग सचेतना कार्यक्रम सञ्चालन गरिरहेको बताइएको छ । उक्त कार्यक्रम प्रति चालकहरुले समेत सकरात्मक रुपमा लिदै सावधानीपूर्व सवारी चलाईरहेका छन् ।