दिक्तेलमा तेश्रो नगरस्तरीय राष्ट्रपति रनिङ शिल्ड प्रतियोगिता सञ्चालन हुने

माघ ६, सोलुखुम्बु । खोटाङको दिक्तेल रुपाकोट मझुवागढी नगरपालिकामा तेश्रो नगरस्तरीय राष्ट्रपति रनिङ शिल्ड प्रतियोगिता सञ्चालन गरिने भएको छ । दिक्तेलस्थित माटिकोरे खेलमैदानमा यहीँ माघ ११ गतेबाट प्रतियोगिता सञ्चालन गरिने भएको हो । कार्यक्रमको उदघाटन युवा तथा खेलकुद मन्त्री तेजुलाल चौधारीले गर्नुहुने भएको आयोजकले जनाएको छ ।

प्रतियोगितामा छात्रछात्रा दुवै तर्फ भलिवल, कबड्डी, एथ्लेटिक्स, कराते र तेक्वान्दो समावेश गरिएको नगरप्रमुख तीर्थराज भट्टराईले जानकारी दिनुभयो । नगरपालिका भित्रका २१ वटा सामुदायिक र ३ वटा संस्थागत गरी २४ वटा विद्यालयले प्रतियोगितामा सहभागिता जनाउने छन् । कार्यक्रमको समापन भने कोशी प्रदेश सरकारका सामाजिक विकास मन्त्री पाँचकर्ण राई(पिके) को प्रमुख आतिथ्यतामा हुने भएको छ ।