खोटाङमा राष्ट्रिय गायन प्रतियोगिता सुरु 

जेठ ६, सोलुखुम्बु ।  खोटाङमा जारी वृहत खोटाङ हलेसी खेलकुद, साहित्यिक, साङ्गीतिक तथा पर्यटन महोत्सव २०८० को गायन विधा तर्फको प्रतियोगिता सुरु भएको छ । महोत्सव अन्तर्गतको १८ वर्षमुनिको राष्ट्रिय गायन प्रतियोगिता दिक्तेल रूपाकोट मझुवागढी नगरपालिका १ दिक्तेल स्थित कभर्डहलमा दिउँसो १ बजेबाट . सुरु भएको हो ।

खेलकुद विकास प्रतिष्ठान खोटाङको आयोजना तथा खोटाङ कलाकार समाजको सह आयोजनामा आजबाट सुरु भएको प्रतियोगिताको उद्घाटन कोशी प्रदेशका पूर्व मन्त्री राजन राईले गर्ने योजना रहेको खोटाङ कलाकार समाजका अध्यक्ष रूपकुमार राईले जानकारी दिनुभएको छ । प्रतियोगितामा २९ जना प्रतियोगीहरूको सहभागिता रहेको उहाँको भनाई छ ।

आज हुने प्रतियोगितामा प्रथम हुनेले ४० हजार नगद पुरस्कार सहित पदक र प्रमाणपत्र प्राप्त गर्ने आयोजकले जनाएको छ ।  यस्तै द्वितीया, तृतीय, चौथो र पाँचौले क्रमशः २५ हजार, १७ हजार, ११ हजार र ७ हजार नगदको साथमा मेडल र प्रमाणपत्र प्राप्त गर्ने छन । महोत्सवमा अव राष्ट्रिय कराँते तर्फका खेल बाकी छन भने यसअघि, हाफ म्याराथन र राष्ट्रिय कविता प्रतियोगिता सम्पन्न भइसकेको आयोजक खेलकुद विकास प्रतिष्ठान खोटाङका अध्यक्ष सञ्जय कुमार राईले बताउनुभयो ।